Thenzawl-a neih mek MSU General Conference vawi 21-na Chief Minister in a hmanpui

Thenzawl-a Mizo Students' Union (MSU) General Conference vawi 21-na neih mek chu nimin khan Chief Minister Zoramthanga chuan khuallian niin a hmanpui a. MSU General Conference-ah hian Palai 700 vel kalin zanin hian a tiak dawn a ni.

Thenzawl Auditorium-a MSU General Conference-ah hian Chief Minister Zoramthanga chuan Zirna piah lama ram leh hnam hmangaihna thinlung pu hetiang zat kalkhawm a hmu chu thlamuanthlak a tih thu sawiin, “Kan chhehvela harsatna thlengte avanga lokal kan unaute tana in hnathawh hmutute kan ni a, in thiltihte hi a chhuanawm a ni,” a ti a. Tunhnaia kan chhehvela buaina leh harsatna tawk kan unauten thlamuang taka mutmu an tuaha, an nitin nun an hman theihna tur Mizoram an rawn pan leh; an beisei ang ngeia ralmuanga an awm mek chu a hlu em em tih sawiin, “Chutiang lo tihsak thei ram, khawvela ram ralmuang ber te zinga mi Mizoram neitu kan ni hi a hlutzia i ngaihtuah thin ang u,” a ti bawk.


Buaina namenlo paltlang hnua ram ralmuang lo ni ta- Mizoram huhang chu a na em em tih pawh Chief Minister chuan sawiin, “Kan neih ang remna leh muanna tluantling neih ve theih beiseiin kan thenawm State leh ram ten Mizoram lam hi an rawn hawi thin a, Aizawl hi an rawn be pawp thin. Mizoram huhang zar pawh kan zo tlang chho zel a, kan la zo chho zel dawn a ni,” a ti a. Tunhnaia zofate thlavang hauh nana Mizoram hmalakna tlangpui tarlangin, he ram leh hnam chhan nan hian tu lakah mah 'dawih aw' kan chhuah thiang lova, kan chhuah ngai hek lovang, a ti a. Buai laia huaisen taka mipuite tana zirlai pawlin hma a lak thinzia chu theihnghilh theih a ni lo tih a sawi bawk.

Nizan hmasa atanga neih MSU General Conference hi naktuk zan thlenga neih tur niin nimin-a Vantlang Inkhawm hi MSU General Secretary Lalramhluna Fanai chuan a kaihruai a, khual zahawm Sports Minister Robert Romawia Royte pawhin Mizoram leh India sawrkar inremna (peace accord) thuthlung kha a hlu em em a, hmasawnna duhawm tak tak kan hmuh chhoh zel bakah Article 371G hnuaiah kan hnam kan ram hi ven tlat kan ni tih a sawi bawk.

Comments

Popular News (Last 30 Days)

LPG man bithliah thar