CJI in cheng nuai 4624.12 senga Aizawl-a sak Gauhati High Court Aizawl Bench building thar a hawng

Cheng nuai 4624.12 senga sak Aizawl MINECO-a Gauhati High Court Aizawl Bench building thar chu Chief Justice of India, Justice Dhananjaya Y. Chandrachud chuan Inrinni khan hawngin, he Building thar hawn tak hian India ram chu dan hmanga enkawl a nihzia a tifiah niin a sawi bawk.

Gauhati High Court Aizawl Bench building thar hawnna hunah hian Chief Justice of India Justice Dhananjaya Y. Chandrachud chuan Court building chu dan rorelna lantirtu a niht hu sawiin, Dan rorelna hi ram kalsiam dawmtu leh chhawm ngiltu a ni, a ti a, Court buildinga thawktute chu Dan rorelna aiawha ding an ni tih sawiin, ramchhunga remna siamtu leh tharum tel lova buaina chingfeltute an ni, a ti a. Gauhati High Court, Aizawl Bench building thar hawn theiha a puitlinna atana theihtawp chhuahtu sawrkar laipui, Mizoram sawrkar, District Administration, PWD leh midangte chungah lawmthu a sawi a. Ram inrelbawlna kawngah Court hian mawhphurhna pawimawh tak a luah avangin a hmunhma tha, thawktuten felfai taka hna an thawh theihna neih a pawimawh a; amaherawh chu a hmunhma tha aia pawimawh zawk la awm kan hriatreng tul chu; Democracy innghahna lungphum pawimawh dan hmanga rorelna (rule of law) dinpui a ni, a ti a. “Vawiina kan hawn Aizawl Bench building thar pawh hian he ram hi Dan hmanga enkawl a nihzia a tifiah a, dan hmanga rorelna hi he ram chelhnghehna pawimawh tak hi a n,” tiin “Gauhati High Court hian danglam bikna tak a neih pakhat chu State pali huamah hna a thawk hi a ni a, a mawhphurhna hi a pawimawh em em a, vawiin-a kan hawn thar Aizawl Bench building thar pawh hian nasa takin hma a sawn zelna turah a thawhhlawk hle dawn a ni,” a ti bawk.

Chief Justice of India chuan Dawhkan kil-a inbiakna chu ram dinhmun tihnghehna atan a pawimawh em em tih pawh he hunah hian sawiin, District Judiciary tihchak pawimawh a tih thu leh khawtlang inremna leh inrawntlanna chu buaina chingfeltu a nih thu a sawi a. Hmarchhak bial-a Ukil te harsatna tawh a hriatthiampui thu pawh sawiin, inkalpawhna chungchangah te, Dan chungchang hriat tawklohna ah te leh Court hmunhma leh hnathawhna tha tawklo te chu siamtha turin heng harsatna te hi thurchhuah zel a ngai a ni, a ti bawk.

He hunah hian Mizoram Chief Minister Zoramthanga pawhin Chief Justice of India in Gahati High Court Aizawl Bench building thar a rawn hawng thei chu lawmawm a tih thu a sawi a. Mizoram chu India in Separation of Juduciary a kalpui khan hmarchhak State-a a taka kalpui hmasatu a nih thu leh, chutiang bawkin Lok Ayukta a lo chhuah leh pawhin Mizoram chu hmarchhaka a kalpui hmasatu a ni leh tih a sawi a. “Tunhmaa Underground kaihruai thintuin Vawiin a High Court building ropui tak hawnnaa thu sawina hun ka hmang thei hian India ropuina leh a chhungah hnam chitinte kan lenzia a tilangfiah a ni,” a ti

Gauhati High Court, Aizawl Bench building thar hawnna hunah hian Gauhati High Court-a Chief Justice Justice Sandeep Mehta chuan inlawmna thu sawiin, Union Minister of State Arjun Ram Meghwal pawhin thu a sawi bawk a. Justice Michael Zothankhuma, Judge, Gauhati High Court chuan lawmthu sawiin, sawrkar mi pawimawh leh sawmbik te an tel a ni.

Inrinni-a hawn tak Gauhati High Court Aizawl Bench Building thar hi NLCPR sum cheng nuai 4624.12 senga sak niin Contractor hi North East Consultancy Services (NECS), Aizawl an ni a. March 7, 2017-ah hna hi thawh tan a ni. A building pui ber (Main building) hi Mizopa chhiar danin chhawng li (4) a sang a ni a, a chhuat palite zau zawng belhkhawm hi sqm. 11612.98 a ni. Building pui ber bakah hian Advocate building leh Visiting Judge Bungalow te pawh sak a ni.