Kumin-ah June thla tawp thlengin TB vanga thi Mizoram-ah mi 62 an awm tawh

Kumin-ah June thla thleng khan TB vanga thi Mizoram-ah mi 62 an awm tawh a, TB vanga damlo, damdawi damdawi ei lai reng reng an thih chuan TB avanga thi-a chhiar tur a ni.

National TB Elimination Programme (NTEP), State TB Cell chuan nimin khan Aizawl Press Club-ah MJA member-te pualin Tuberculosis (TB) chungchang inhrilhriatna hun an buatsaih a, he hunah hian State TB Officer Dr. Vanlalfela chuan India ramah kum 2025 ralhma ngeiin TB umbo tum a nih thu a sawiin, kum 2024-a TB kan umbo theihna atana inkaihruaina 'Road Map to TB Free Mizoram lehkhabu buatsaih pawh March 24, 2023 khan Health minister Dr. R. Lalthangliana'n a tlangzarh tawh thu an sawi a. Mizorama District zawng zawngte an hmalak dan tur kimchang taka tarlan a nih thu a sawi a ni.

TB natna hi ei leh in tha hmu lo leh ei lo te nen a inkungkaih thuk hle tih sawiin Dr. Vanlalfela chuan, “Ei leh in tha hmu loten TB an vei duh bik. Chutiang bawkin TB damlote pawhin an damloh chhunga ei leh tha an hmuh loh chuan an dam chak thei lo,” a ti a, sawrkar chuan TB damlo ten TB natna an vei chhunga an ei leh in an tih thatna atan Nikshay Poshan Yojana Scheme kaltlangin Bank Account-ah thla tin Rs. 500 a pe thin tih a sawi a. Pradhan Mantri TV Mukt Bharat Abhiyaan Scheme hnuaiah TB damlote tan chawtha eina tur donation thawh theih a nih thu leh TB vei mi pakhat tan thla 6 chhung sponsored theih a ni tih a sawi a, thla tin Rs. 700 zelin thla ruk (6) chhunga pek tur a ni a. TB veite ei leh in tur sponsored turin mipuite an sawm nghal bawk.

NTEP, State TB Cell hotute chuan Zemabawk-a an hmun atanga sawnchhuah an nih hnuah TB veite enkawlna bik damdawi In a awm tak loh thu sawiin, “TB veite enkawlna bik hi chu awm leh se duhthusam a ni. Natna inkaichhawn theih a nih bakah, damlo thenkhat lo thinhrik tawkte an awm thin. A hranpa awm leh se chuan, inenkawl a awlsam phah lehzual ang,” an ti bawk.

He hunah hian kum 2019 atanga kum 2023 June thla thlenga an hnathawh leh thlenchin tlangpui tarlangin kum 2019 atanga kumin June thla thleng khan TB rinhlelh test mi 57,009 awmin TB vei mi 10,075 hmuhchhuah an ni a, hemi hun chhunga TB thihpui zat hi mi 314 an awm bawk. TB vei zingah hian HIV positive kai tel kum 2019-ah zaa 14, kum 2020-ah zaa 13, kum 2021-ah zaa 16, kum 2022-ah zaa 15 leh kumin ah June thla thlengin zaa 12 an awm bawk a ni. Kumin bikah hian June thla tawp thleng khan Mizoram-ah mi 6,683 enfiah atangin TB hrik pai mi 1,144 hmuh an ni tawh a, TB vanga thi mi 62 an awm tawh bawk a ni.