Advertisement lova hna lak a awm lo - Home Deptt.

Mizoram sawrkar-a Home Department chuan Advertisement lova hna lak an neih loh thu an sawi.

Home Department thuchhuah in a tarlan danin, Home Department hian Advertisement lova hna lak a neih loh thu tarlangin, amaherawhchu, Mizoram Sawrkar dan dinglai angin Mizoram Police hnuaia post awmzat atanga zaa panga (5%) chu Compassionate appointment quota a nih thu leh chutiang chuan Service laia Police boral chhungte mi 304 chu tunhnaiah Compassionate in dan dinglai awm ang te zawm vekin appointment pek an ni zawk tih an tarlang a ni. Home Department chuan Compassionate hi advertisement a tih tur tih dan hi a awm lo tih tarlangin, Mizoram Sawrkar Department zawng zawng te zawm tur DP&AR(GSW) in Office Memorandum a chhuah angin hmalak a nih thu an tarlang a. “Chutiang chuan Police service laia thi chhung ten dilna an thehlut a, chung mite dilna behchhan chuan Spot Verification te neih vek hnuah Screening Committee in dan ding lai angin a phu (deserve) te chu thlangchhuak lehin heng mite tan hian Sawrkar-DP&AR(GSW) leh Finance Department te phalna la in appointment hi pek an ni zawk,” tiin an tarlang a ni.

Home Department thuchhuah in a tarlan danin tunhnaia Compassionate appointment a Police lak te hi Head Constable 10, Constable 283 leh Group D mi 11, an vaiin mi 304 te an ni a, heng post 304 bakah hian Compassionate appointment in Constable post pakhat leh IV Grade post pakhat tunhnaiah hnawhkhah ni bawkin, heng mite pawh hi duty lai a thi pahnih chhungte an nih thu an tarlang a ni.