Health Minister in Serchhip District Hospital tlawhin MNF Political Training a hmanpui bawk

Health Minister Dr. R. Lalthangliana chuan nimin khan Serchhip tlawhin Seerchhip-a District Hospital leh Health Department hmunhma te a enfiah a, District Hospital thar sakna tur lungphum phum tura ruahman erawh hun danga phum tura tih a ni.
Serchhip District Hospital tlawhtu Health Minister hi Serchhip CMO Dr. LP. Malsawma leh District Medical Superintendent Dr. ZD. Lalmuanawma bakah thawktu dang ten an lo dawngsawng a, an dinhmun, mamawh leh harsatna an neih te lo thlenin, Health Minister chuan Serchhip District chhungah hmasawnna hmuh tur tam tak a awm a, chutihrualin tan lak tulna lai engemaw zat a la awm tih a sawi a. Hriselna kawnga hmalakna chu sawrkar leh thawktute chauh tih theih a ni lo tih sawiin, mipuite nen tangruala hma lak a tul tih a sawi a. Sawrkar chuan hriselna a ngai pawimawh a, nasa lehzuala hmasawn turin theihtawp an chhuah mek zel tih a sawi bawk.


Health Minister hian Serchhip District Hospital thar sakna tur lungphum chu nimin khan a phum dawn nia tarlan ni mah se hun remchang danga phum turin ruahman a ni leh ta zawk nia thudawn a ni a, Serchhip District Hospital hmunhma hi Minister hian chipchiar taka fangin, Hospital building hlui thenkhat thiata khum 100 awm theihna tur Hospital Building thar sak a nih dawn avangin a sak dan tur inbuatsaihna kal mek a enpui bawk.

Serchhip District Hospital a tlawh hnu hian MNF East Block Serchhip ten Serchhip Kawnpui VC Hall-ah 'Political Training' an buatsaih chu MNF Adviser ni bawk Dr. R. Lalthangliana chuan a hmanpui bawk a, Sawrkar pangngai, tluang taka an sawrkar hun ang kha MNF Term-ah hian a awm lo tih sawiin, “Harsatna tinreng - Covid, Lirnghing, Vawkpul hri, ramri buai, kan unau raltlan tuamhlawm ngaite kan tawk a ni. India ram dangin an tawh loh kan buaipui hnem em a. Pathian leh Kohhran, mipui leh sawrkar tanhona vangin tun hi kan la thleng tawk tawk a ni,” tiin hetiang ang harsatna tam tawk hi sawrkar term khatah a la thleng ngai lo tih a sawi.

Dr. R. Lalthangliana chuan, “Kan sawrkar hi engmah ti mang lo angin an chhuah mai mai a. Serchhip chauh hi sawi ila- Serchhip College Administrative Building te pawh sak mek a ni a. Serchhip Hospital sak tharna tur Lungphum pawh kan phum thuai dawn a, Damdawi In lian tha tak in nei tur hi ka lawmpui che u a ni,” a ti a. Pathian khawngaihna vangin inthlan lo awm turah pawh sawrkarna an chelh leh a rin thu a sawi bawk.

Comments

Popular News (Last 30 Days)

Vawiin-ah HSSLC Exam result