OSC-a thawktute leh MHIP hruaitu ten inkawmna an nei

One Stop Centre, Serchhip-a thawktute leh MHIP Sub-Hqrs. Serchhip hruaitute chu nimin khan Serchhip Bazar-a MHIP Office-ah inkawmin Hmeichhe chawikan leh hmeichhia te dikna chanvo humhalhna kawnga chak zawka thawhhona an neih theih dan tur kawng hrang hrang an sawiho.
Nimin-a inkawmhona hun hi MHIP Sub-Hqrs. Serchhip President Lianthangi chuan kaihruaiin OSC-a thawktute nen inkawmhona hun an hmang thei chu an lawmin thawhhona tha tak an neih zel a beisei tih a sawi a. He hunah hian One Stop Centre atangin Centre Administrator Lalchhan-himi leh Case Worker Angela Vanlalruati te chuan One Stop Centre kalphung leh hnathawh dan hrang hrang te sawiin, hma an lo lak tawh dante an sawi bawk a, zawhna leh chhanna hun hlawk thlak tak an hmang bawk.

Serchhip-a One Stop Centre hian tunlai hian Kohhran Hmeichhe pawl, Anganwadi-a kal thin nu ho leh MHIP Branch hrang hrangah an hmalakna leh hnathawh dan inhrilhfiahna hun hi an hmang mek a, nimin-a MHIP Sub-Hqrs. Office-a hun an hmanna ah hian OSC-a thawktute an tel bakah Serchhip khawpui chhunga MHIP Branch hrang hrang atangin hruaitu mi 50 vel an tel bawk a ni.