C&I Minister in Thenzawl-ah Market building leh Handloom Export Facilitation Hub a hawng
Thlai leh sa zawrhna tura ruahman Thenzawl Market Building thar hawnna hunah hian Dr. R. Lalthangliana chuan mipui mimir tana tangkai, kut hnathawktuten an thil tharchhuah te an zawrh theihna tur Bazar Building tha tak hawn a ni ta chu lawmawm a tih thu sawiin, Sawrkar chuan ei leh bar a kan intodelhna turin hma a lak thu leh he Market building hawn thar tak pawh hi chumi kawnga tangkai tur, loneitute tana sum lakluh theihna tur kawng hawngtu pakhat a nih theih ngei a beisei thu a sawi a. Mizoramin tunhnaiah harsatna hrang hrang a tawk tih sawiin, “COVID hripui a leng a, Vawk hri avangin vawk sing nga chuang an pul tawh a, khuarel chhiatna te a thleng a, thenawm ram a Zohnahthlak harsatna tawk te himna zawngin Mizoram-ah an rawn tlan a; hriat lawk loh harsatna hrang hrangin Mizoram a tlakbuak chung pawha hmasawnna hna thawh zawh tawh, thawh mek leh thawh tura ruahman engemawzat a awm hi a lawmawm tak meuh a ni,” a ti bawk.
Thenzawl-a sawrkar hmachhawp hrang hrangte pawh Commerce and Industries Minister chuan he hunah hian a sawi lang nghal a. Puantahna hmunpui, puan an tah thiam em avanga lar Thenzawl khua chu hmanraw hrang hranga thuam a ni dawn tih a sawi a. Khawvel zau zawk thlirin ramchhung chauh ni lo ram pawn thlenga kan thil zawrhin hralh a tlak theih nan kan thil siamchhuah reng reng quality tha, belhchian dawl a ni tur a ni, a ti bawk.
Thenzawl Market Building thar hawn tak hi State sum cheng nuai 150 senga sak niin February ni 22, 2021 khan sak tan a ni a, a building hi chhawng hnih niin a chhawng hnuai zawk hi Sa zawrhna tur niin Market Office siam a ni bawk a. A chhawng chung zawk hi chawhmeh zawrhna tura ruahman a ni thung a, mi 23 vel thut theihna tur a nih bakah Godown a awm bawk a ni. Heng floor pahnihah hian mipa leh hmeichhe tan inthiarna hmun siam ve ve a ni bawk a. Sa leh thlai zawrhna turah hian Dawhkan siam vek a ni bawk.
Nimin-a Minister in a hawn Mizoram Handloom Export Facilitation Hub-ah hian Guest House, Exhibition Hall cum Conference Hall, Permanent Stall 9, Design Development Centre, Common Facility Centre, Restoration leh Staff Quarters te a awm a. He Project in a tum ber chu Mizoram-a puantah leh design mawi tak tak te hmanga ramdanga thawnchhuah tur siamchhuahna hmunpui tura ruahman a ni a. Textile Testing Laboratory leh Design Studio te, la dumna tur dyeing unit te bakah khawl changkang tak tak Warping Machine, Bobbin Winding Machine, Fly Shuttle Frame Loom leh a dang te dah tum a ni bawk.
He hmalakna hnuaiah hian Mizoram-a puantah te chu Indian Handloom Brand hnuaia inziah-luha, Bar code te pek thlap tum a ni a, tualchhung puantah te chak zawka hralh a nih theih nan e-commerce platform hrang hrangah zawrh chhuah tum a ni bawk.
Thenzawl-a Market Building thar leh Mizo-ram Handloom Export Facilitation Hub hawnna hun nimin-a neih hi Commerce and Industries Department-a Additional Secretary K. Lalhmingliana chuan kaihruaiin Commerce & Industries Director Florence Zotluangpuii chuan Market Building sak a nih dan Technical report a pe a. Hei bakah hian Thenzawl hmuna an Department hmalakna hrang hrang leh hma-chhawp te a tarlang nghal a. Mizoram Handloom Export Facilitation Hub chhunga mamawh hmanraw hrang hrang leina tur leh cheina tur sum cheng nuai 836 dil mek a nih thu a sawi bawk.
Comments
Post a Comment