ECI-a Sr. Dy. EC in State Level Master Trainer-te a kawm

Mizoram in kumin a Assembly inthlanpui a hmachhawn tura inbuatsaihna atana training hrang hrang pe tura thlanchhuah State Level Master Trainer mi 18 leh District Level Master Trainer mi 33 te chu nimin khan Aijal Club-ah Dharmendra Sharma Sr. Deputy Election Commissioner leh Director General, IIIDEM chuan a kawm.

Dharmendra Sharma chuan State Level Master Trainer ten training an dawng tha ngei em tih hrechiang tura he hun hi buatsaih a nih thu sawiin, Master Trainer-te chu Election Commission of India-in inthlan buatsaih dan tur ziakna Instruction leh lehkhabu hrang hrang, Manual leh Handbook thar ber a tihchhuahte uluk taka chhiara vawng turin a chah a. Tun hnaia Election Petition hrang hrangte lo chhiar a, chungte chu inzir nan hmang turin a hrilh bawk.

State Level Master Trainer mi 18 te hian India International Institute of Democracy and Election Management (IIIDEM) buatsaih 3-Phase Training Programme paltlang tawhin, Evaluation Test pawh an paltlang tawh a. District Level Master Trainer te hnenah training an pe chhawng dawn a ni.