Home Minister in 2nd IR Battalion hmunpui a tlawh

Home Minister Lalchamliana chuan nimin khan Khawzawl Lungvar Veng-a 2nd IR Batallion hmunpui chu tlawhin thawktute nen inkawmna hun an hmang.

Home Minister chuan amah lo dawngsawngtute chu mahni hna rinawm taka thawh chu zahawmna a ni tih hre reng turin a chah a, Mihring indaihloh chung pawha Mizoram Police ten hna tha taka an thawk thin chu fakawm a tih thu sawiin, a bikin Aizawl Traffic Police leh Cyber Crime Police-te chuan State dangte khaikhin pawhin hna an thawk tha takzet tih a sawi a ni. Police indaihlohna hnawhkhah tumin sawrkarin theihtawp a chhuah thu pawh Home Minister chuan sawiin, hripui lengin harsatna a thlen avangin duhthusamin post ruak hnawhkhah theih ni lo mah se compassionate appointment atanga lak mi 290 in training an nei mek tih a sawi bawk.

2nd IR Batallion hi Mizoram Police hnuaia Armed Batallion 5-na ni turin January ni 15, 2001 khan din a ni a. Tuna an awmna Khawzawl Lungvar Veng-ah hian April ni 5, 2005 atangin an awm a. Tun dinhmunah hian Commandant Saidingliana kaihhruaina hnuaiah mi 465 vel zet an awm mek a ni. 2nd IR hian hmun 15 - Khawlian BOP, Suangpuilawn BOP, Vanbawng BOP, NE Khawdungsei BOP, Champhai PS, Khawzawl PS, Saitual PS, Zokhawthar PS, Dungtlang PS, Ngopa PS, SBI Champhai, District Court Cham-phai, Khawzawl Link Office bakah Tuivai leh Mimbung Temporary Post-ah te venhimna hna an thawk mek a ni.

Taxation Department changtu ni bawk Lalchamliana hian nimin khan Saitual-ah Deputy Commissioner of State Tax Office a hawng bawk a, Mizoram hmasawn leh than zel nan Sawrkar leh mipuiin tihtur kan neih ve ve thu sawiin, rinawm leh dik taka dan anga chhiah pek chu kan tih makmawh a nih thu a sawi bawk.