College hrang hranga thawktu indaihlohna a theih ang anga hnawhkhah tum a ni

Higher & Technical Education Minister Dr. R. Lalthangliana chuan College hrang hranga zirtirtu leh thawktu indaihlohna chu ramin sum harsatna a tawh mek avangin duh anga hnawhkhah mai theih nilo mahse a theih ang anga hnawhkhah tum a nih thu a sawi.

Zirtawpni kalta zan-a zawhfel tak Mizo Students’ Union (MSU) General Conference vawi 21-na Thenzawl Auditorium-a neih a hmanpuina ah H&TE Minister Dr. R. Lalthangliana chuan Covid hri leng avangin Mizoram Sawrkarin harsatna a tawk nasa tih sawiin, he hri leng piah lamah ramdangin an tawh ve loh harsatna tam tak Mizoram in nasa takin a tuar tih a sawi a. “Bangladesh, Myanmar leh Manipur-ah Zofaten harsatna nasa tak an tawh avangin theihtawp chhuahin Mizoram chuan a tanpui a, Covid hri leng mai bakah hriat lawk loh harsatna hrang hrangin ram a tlakbuak avangin Sawrkar pawhin an tum ang leh ruahman angin hma an la thei lo ,” a ti a. College hrang hranga zirtirtu leh thawktu indaihlohna chu ramin sum harsatna a tawh mek avangin duh anga hnawhkhah mai theih nilo mahse a theih ang anga hnawhkhah tum a nih thu a sawi a ni.

Minister Dr. R. Lalthangliana chuan Mizo ten danglamna tak kan neih zingah tlawmngaihna chu sawifiah thiam a har thu leh, pi pu chen a kan rohlu heng tlawmngaihna, aia upa zahthiamna leh rinawmna te chhawm nung zelin, Pathian in kan thinlunga a dah ngheh tlat hmangaihna leh lainatna te vawng nung zel turin zirlai kalkhawmte chu a sawm a. “Khawvel thiamna sang tawh takah hian thiamna tak tak kan neih loh chuan kan ramah hnathawk turin hnamdang an rawn lut zel anga, min chimralna kawng a la ni thei dawn a; chuvangin, tih tak taka kan beih hi a tul tak zet a ni,” a ti bawk.

MSU General Conference hi Human Resources Development Board Vice Chairman Dr. L. Thangmawia MLA pawhin hmanpuiin Pathian in Mizo zirlai rualte thinlungah hnam hmangaihna thinlung a dah tlat mai hi thil mak leh thil ropui tak a ni, a ti a. “Kan Pathian hian zirna a ngaipawimawh em em a; chuvangin, kan hnam kan vei em em rual hian Mizo thalai ten zirna kawngah tan kan lak a ngai a ni,” tiin mi in thiam taka an sawi avangin a nihna tak zirchiang hmasa lova mi thusawi pawm ngawt lo turin kalkhawmte a chah a. Kan ram hruaitute hian eng nge an tih thin tihte pawh zirchian nachang hre turin zirlaite a chah bawk.