MP pahnih ten Serchhip District-a MP Fund an pek cheng nuai 97 hmangin hna 15 thawh a ni tawh

Mizoram Lok Sabha MP C. Lalrosanga’n MP Fund a pek hmangin Serchhip District-ah hna 10 thawh a ni tawh a, Rajya Sabha MP K. Vanlalvena’n MP Fund a pek hmangin hna panga (5) thawh ni tawh bawkin heng hna chi hrang hrang thawhna atan hian cheng nuai 97 sen a ni tawh a ni.

RTI hmanga zawhna Serchhip DC Office-a SPIO in ziaka a chhanna atanga a lan danin Mizoram Lok Sabha MP C. Lalrosanga’n MP Fund a pek hmang hian kum 2019-2020 atanga 2022-2023 chhungin hna chi hrang hrang 10 thawh ni tawhin heng atana sum ruahman chu a vaiin cheng nuai 59 zet a ni. Lok Sabha MP C. Lalrosanga’n MP Fund a pek hmang hian kum 2019-2020 khan Serchhip District-ah hna pathum thawh a ni a, heng te hi cheng nuai 5 senga Bungtlang-a Waiting Shed cum Toilet (I/A Village Council Bungtlang) sak te, Cheng nuai 3 senga Serchhip Dinthar Veng-a Step siam (I/A YMA Dinthar Veng, Serchhip) leh cheng nuai 6 senga Lungkawlh-a Watch Tower (I/A Lungkawlh YMA) sak te a ni.

Kum 2021-2022 chhung khan Lok Sabha MP in MP Fund a pek hmangin Serchhip District-ah hna pahnih thawh leh a ni a, cheng nuai 10 sengin Khumtung Field Veng-ah PCC flooring (I/A MUP Khumtung) thawh a nih bakah cheng nuai 5 sengin Lungchhuan Community Field Levelling (I/A Village Council Lungchhuan) hna thawh a ni bawk. Sawrkar kum liamta 2022-2023 chhung khan MP Fund hmang hian hna panga (5) lai thawh leh a ni a, cheng nuai 2 in Khawlailung-ah Futsal Ground siam (I/A Village Council Khawlailung) niin Hmunzawl leh Khawlailung inkar Tuichang lui-ah cheng nuai khat sengin Lei siam (I/A Village Council Khawlailung) a ni a, cheng nuai 2 sengin North Vanlaiphai Venglai-ah MUP In sak (I/A MUP Venglai, North Vanlaiphai) ni bawkin Baktawng-ah Public Playground chu cheng nuai 15 sengin (I/A Village Council Baktawng) siam a ni bawk a, cheng nuai 10 sengin Thenzawl Vengthar Field-ah Footpath leh Handrailing (I/A Village Council Thenzawl Vengthar) siam a ni bawk.

Mizoram Rajya Sabha MP K. Vanlalvena’n MP Fund a pek hmangin kum 2021-2022 leh 2022-2023 chhungin hna panga thawh ni tawh bawkin heng ah hian a vaiin cheng nuai 38 sen a ni tawh bawk a, Rajya Sabha MP K. Vanlalvena’n MP Fund a pek hmang hian sawrkar kum 2021-2022 chhung khan hna pathum thawh niin, Bungtlang-ah Zaite chhuah leh Darnam inkar Jeepable (Agriculture Link Road) cheng nuai 10 senga siam (I/A Village Council Bungtlang) niin North Mualcheng-ah cheng nuai thum (3) sengin MHIP House (I/A MHIP N. Mualcheng) sak a ni a. Cheng nuai 10 sengin Leng khuaa Zuva Zau-ah Agriculture Link Road (I/A Village Council Leng) laih a ni bawk.

Kum 2022-2023 chhung khan Mizoram Rajya Sabha MP in MP Fund hmangin hna pahnih thawh a ni bawk a, heng te hi East Lungdar Arsimual-ah cheng nuai 10 hmangin Agriculture Road (I/A Village Council East Lungdar) leh Zawlpui to Tuichar Link Road PCC Flooring (I/A MUP AOC Veng, Serchhip) cheng nuai 5 senna te a ni.

RTI chhanna atanga a lan danin Lok Sabha MP in MP Fund a pek hmang hian Serchhip Assembly bial leh Tuikum bial-ah hna pahnih ve ve thawh niin Hrangturzo Bial-ah hna 6 thawh a ni tawh a. Rajya Sabha MP in MP Fund a pek hmang hian Hrangturzo bial-ah hna 4 thawh a nih tawh laiin Ser-chhip Bial-ah hna pakhat thawh a ni tawh a, Tuikum bial-ah chuan hna thawh ala awm lo a. Tuna Mizoram MP pahnih ten Serchhip District chhunga Assembly Bial pathum huamchhunga MP Fund an pekchhuah zawng zawng hi a vaiin cheng nuai 97 zet a tling tawh a ni.

Heng MP Fund hmanga hnathawh hrang hrangte hi zawhfel ni tawhin sum rua-hman pekchhuah loh a awm lo tih SPIO chuan a tarlang bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar