Chhingchhip-a Sainik School Air Marshal in a tlawh

Mizoram-a rawn zin India thlawhna sipai hotu Air Marshal SP. Dharkar, PVSM, AVSM, Air Officer Commanding-in-Chief, Eastern Air Command chuan nimin khan Serchhip District chhung Chhingchhip-a awm Sainik School chu a hmunah a rawn tlawh.

Air Marshal SP. Dharkar hian nimin zing khan Indian Air Force Helicopter hmanga Serchhip rawn thlengin Chhingchhip-a Sainik School hi a pan nghal a, Sainik School Principal Wg. Cdr. Shahul Hameed leh a thawhpui ten lo dawngsawngin Sainik School Auditorium-ah programme hman zui a ni a, zirlaite fuihna thu a sawi bakah zirlai hian an thiamthil chi hrang hrang leh Hnam Lam te an lo entir bawk a ni. Sainik School-a hun a hman zawh hnu hian Air Marshal SP. Dharkar hi Serchhip-ah rawn kir lehin Helipad atangin Aizawl lam a pan leh a ni.