ZMC Academic Building hawng

Zoram Medical College (ZMC) Founding Day vawi 5-na chu nimin khan hman niin Chief Minister Zoramthanga chuan ZMC Academic Building thar a hawng bawk.

Nimin-a he hun hmanna ah hian Chief Minister chuan zirlai tithate hnenah lawmman semin sawrkar laipui atanga cheng vbc. an dawn hmanga ZMC lo indin chhoh dan a sawi a. Hmathlir fel tak neia hmasawnna hna hi kalpui a ngai tih sawiin, a tira hmathlir thui tak nei chunga Falkawn-a an lo dah chu a fuh em em tih sawiin, “Chutiang bawkin hmathlir fel tak neiin MI-NECO te pawh din a ni a, chutiang zelin thil dang dangah pawh hmathlir fel tak zarah hmasawnna duhawm tak tak hi kan hmu zel dawn a ni,” a ti.

Khual zahawm Health Minister Dr. R. Lalthangliana pawhin kan ramah Doctor indaih-lohna a nasa a, nimahsela ZMC zarah reilote ah Mizoram hian Doctor kan indaih thuai dawn tih sawiin, “MBBS china kan lungawi mai a thiang lova, sang zawka kal zela he College ngeiin zirna sang zawk a kalpui huna Faculty tha tak tak rawn ni thei tura kan beih a ngai a ni,” tiin zirlaite a fuih a. ZMC Recognition Inspection neih lai laiin Covid Dedicated Hospital atan puan a nih thu leh chuti chungaNational Medical Commission in Recognition a pe chu a lawmin a hlu tih a sawi bawk.

ZMC Academic Building thar hi Ministry of Health & Family Welfare, Govt. of India sum cheng vbc. 60 senga sak niin kum 2018 khan a sak hna bul tanin nikum laihawl khan sak zawh a ni. A building hi chhawng ruka sang niin Department hrang hrang pariat, Lecture Hall pali leh Exam Hall te bakah Laboratory te dah an ni a. M/s MP Khaitan te sak a ni.

ZMC-ah hian MBBS zirlai Batch 5 awmin zirlai 489 an awm mek a. Batch tinah hian Seat 100 awmin 70% chu Mizoram State quota a ni a, a dang 15% chu All India Quota niin a dang 15% hi Non Resident India quota a ni.