Ruahsur vangin harsatna thleng

Tunhnaiah ruah tam tham tak a sur avangin Mizoram hmun hrang hrangah chhiatna thleng a awm tan mek a, khaw thenkhat ah tuilian avangin mi tam tak hmun him lamah thiarchhuah an ni tawh bawk.

Kar hmasa tir lam atanga Mizoram-ah ruah a sur avang leh kar tawp lamah ruah tam zawk a sur avang hian Mizoram hmun hrang hrangah leimin a tam chho tan hle a, tunhnaia Aizawl Vaivakawn Zohnuai, Ropaiabawk panna kawng min chu che zui zelin kawng chhuat a khi chat vek tawh a, July 27-a Vanlalkunga Sailo te chenna In chim bang pawh chim leh tawhin an In hi a chim ta vek a, a bula Lalramthanga Sailo te In pawh dinhmun him lo ah a awm mek bawk a ni.

Tunhnaia ruahsur nasa avanga Tuilian ah Chawngte chuan harsatna tawkin nimin thleng khan chhungkaw 45 te chu hmun him lamah sawnchhuah an ni tawh a, ruah hi a sur chhunzawm zel a nih chuan tuilian-in a chim mai theih In dang engemawzat a la awm avangin mipuite chu ruahsur kaihhnawiha chhiatna hrang hrang thleng thei lakah fimkhur turin thuneituten an chah a ni. Chawngte SDO (Civil) Lalneihthanga Colney chuan, tuilian vanga harsatna thlen dan hi a enfiah nghal a, tuilian vanga harsatna thleng mek chu uluk takin an vil tih sawiin, mipuite chu chi-ai lo tur leh Sawrkarin ruahmanna a siam te zawm thiam turin a chah a ni.

Ruahsur nasa vanga Khawthlangtuipui chim chin a san belh zel avangin Tlabung-ah pawh chhungkaw 30 chu hmun him lama sawn an ni tawh a. Tlabung SDO (Civil) H. Zonunmawia kaih-hruaina hnuaiah mawhphurhna hrang hrang chelh tura ruat Tlabung VC, Khawthlangtuipui Group YMA leh Young Pahari Association aiawhten tuilian tuarte chhawmdawl hna hi an kalpui a, Tlabung bakah hian Nunsury-a chhungkaw 4 leh Tippere-ghat-a chhungkaw 6 chu hmun him lama thiar-chhuah an ni tawh a, tuilian hi a zual zel avangin Tlabung Branch YMA chu nizan khan inkokhawmin a tul apianga che chhuak thei turin an inralring tawh bawk a ni.