Hindi thiam tel tha a tih thu Governor in a sawi

Mizoram Governor Dr. Hari Babu Kambhampati chuan Mizo thalai ten theihna sang tak an neih thu leh an thiamna te behchhan hian India ram khawi hmunah pawh eizawnna tha tak tak an hmu thei nia a hmuh thu sawiin, Hindi tawng erawh an thiam tel tha a tih thu a sawi.

Governor Dr. Hari Babu Kambhampati hian nimin khan Raj Bhavan-ah Padma Shree dawngtu C. Kamlova kawmin Mizoram-ah Hindi zirtirna chak zawka kalpui theih dan tur an sawi a. Governor chuan C. Kamlova thawhhrima leh Hindi zirtirna kawnga hma a lo kak tawhna te chu fakawm a tih thu sawiin, Mizoram-ah kan thalai ten Sap tawng-ah harsatna an neih loh lain Hindi tawng-ah erawh hmasawnna tur an nei nia a hriat thu a sawi a. Mizo thalaite hian theihna sang tak an neih thu leh an thiamna te behchhan hian India ram khawi hmunah pawh eizawnna tha tak tak an hmu thei nia a hmuh thu sawiin, Hindi tawng erawh an thiam tel tha a tih thu a sawi bawk. Governor chuan Mizo thalai te zingah Hindi tawng thiam chak tam tak an awm chu vanneih thlak a tih thu pawh sawiin, State thenkhatah te chuan Hindi tawng zir duh lo leh dodaltu an awm laiin Mizo thalaite chuan Hindi thiam pawi an ti lovin a tangkaina an hria tih a sawi bawk.

Governor chuan C. Kamlova hnenah hian tun dinhmuna School naupangte hnena Hindi zirtirna kalpui dan leh Hindi Prachar Sabha hmalakna te pawh a zawt a. Padma Shree dawngtu C. Kamlova chuan Governor in Hindi zirtirna uar tura hmalakna kalpui a duh chu thil phurawm tak a ni tih sawiin, tunah hian School-te Hindi zirtirna tha taka kalpui a nih rualin mipui nawl puiin Hindi an zirna tur atan chuan hmalakna thar a ngai niin a sawi a. Hemi chungchangah hian Proposal siam a nih tawh thu sawiin, chu Proposal chu Mizoram sawrkar pawhin a pawm tawh a, tunah hian NEC hnenah Art & Culture Department in a thawn tawh tih a sawi.

He proposal ang hian Hindi zirna turin lehkhabu buatsaih a ni dawn a, lehkhabu hi a thlawnin School, NGO te leh a duhtute hnenah sem tura ruahman a ni a. Kumtin NEC hnuaiah hian India hmarchhak huam chhunga Hindi zirtirna atan sum dahhran a ni a, chumi behchhan chuan he proposal hi siam a ni tih a sawi bawk. Hindi zirtirna atan proposal, Mizoram in a NEC a thehluh tak chu pawm a nih theih na turin Governor chu hma la turin a ngen nghal bawk a ni.