SW&TA Minister in Aizawl-a Old Age Home leh Protective Home te a tlawh

Social Welfare & Tribal Affairs Minister Er. Lalrinawma chuan nimin khan Aizawl Ainawn Veng-a Old Age Home leh Hunthar Veng-a Protective Home te tlawhin thawktute nen an inkawm.

Old Age Home hi Mizoram Sawrkar, Social Welfare Department hnuaiah March 1, 1989 khan hawn tan niin kum 60 chunglam Mizoram khua leh tui dik tak, chhungte enkawltu neilo te awmna niin tunah hian mi sawm (10) enkawl mek niin thawktu 8 an awm mek a. Er. Lalrinawma chuan kum upa te hlut nachâng kan hriat a ngai tih sawiin, chhan hrang hrang avanga upa zawk te helai hmun a enkawl ngaia an awm chu pawi a tih thu a sawi a, thawktute pawhin rawngbawlna ah ngaiin thahnemngai taka enkawl turin a chah a ni.

Hemi hnu hian Hunthar Veng-a Protective Home, State Social Welfare & Rehabilitation Centre chu tlawhin he Centre hi kum 1990-ah din niin mi 50 awm theihna a ni a, he hmunah hian Puantah, Puanthui, Beauty Culture leh Computer-te zirtir thin niin an an awm hun chhung hi thla 7 a ni a, tunah hian mi hmeichhia 43 leh naupang 5 awm mekin thawktu 22 an awm mek bawk a ni. SW&TA Minister chuan Hmeichhia harsatna tawk, dawmkan ngai te kaihhruaina leh an an eizawnna tur thiamthil zirtirna hmun buatsaih a ni chu thil lawmawm tak a ni tih a sawi a.Thawktute chu an inpekna ah lawmthu hrilh in tanpui ngaite puitu leh tuamhlawmtu an nih a hria a, tan la zel turin a chah bawk.

Comments

Popular News (Last 30 Days)

LPG man bithliah thar