PAC Member bang ta thuchhuah HPC in tha lo an ti

Hmar People’s Convention (HPC) General Hqrs. chuan chibil/hnam bil boruak thalo siam thei ang zawnga thuchhuah siam chu tun hnuah tih ni tawh lo se an duh thu an sawi.

Nimin-a thuchhuah an siama HPC General Hqrs. chuan ZPM PAC Member atanga bang ta Phairothanga’n August 2, 2023-a Press Statement a siam ah Chibil/hnam bil politics chawk nung thei a duh loh thu tarlangin, “Kumin 2023 inthlanpui lo awm tura ZPM leh HPC General Hqrs. inbiakna pawh kohhran leh NGO te duhdan kalh a ni,” tiin a tarlang tih an sawi a. He thuchhuah hi an ngai thutak in an hrethiam lo hle tih tarlangin, “HPC Party hi Registered Party, Election Commission of India hnuaia registration nei a ni a, he party ah hian Zofate zawng zawng an leng vek a ni,” an ti a. “HPC Party hian MLA Election apiang hian candidate a siam loh chuan Mizoram Party hrang hrangte a lo thawhpui vek tawh a, Kohhran leh NGO kalh zawngin vawikhat mah hma a la ngai lo a ni tih Phairothanga hian min lo hriat sak se kan duh a. Hetianga chibil/hnam bil boruak thalo siam thei ang zawnga thuchhuah a siam hi tun hnuah ti tawh lo turin kan ngen,” tiin hnam bil/chi bil boruak chhe thei ang zawnga politics khel tawh lo turin an ngen bawk.