Kum 25 chhung MLA leh Term thum Cabinet Minister nih avanga lawmthu sawina hun hmang

Mizoram sawrkar-a Minister ni mek. R. Lalzirliana chuan kum 25 chhung Mizoram State Legislative Assembly-a Member leh kum 15 chhung Cabinet Minister ni theia Pathian in a lo kaihhruai vanga Pathian hnena lawmthu sawina hun nimin khan Armed Veng North Community Centre-ah an buatsaih.

Minister R. Lalzirliana hi a tum khatna atan kum 1998 khan Congress Party ticket-in Saitual Bial (tuna Tawi Bial ni ta) ah MLA atana thlantlin niin, Congress Party ticket vekin 2003, 2008 leh 2013-ah te a Bial ngaiah thlantlin leh a ni a, a tum ngana atan kum 2018 khan MNF ticket-in a Bial ngaiah bawk thlantlin leh a ni.

Kum 1998 leh 2003-ah te Assembly House-ah eptu lamah thuin, kum 2008-a Congress Party-in sawrkarna an siam khan Cabinet Minister a ni a, kum 2013-a an sawrkar nawn leh pawhin Cabinet Minister ni lehin kum 2018 MLA inthlan dawnah MNF a zawm a, MNF-in sawrkarna siam zuiin Cabinet Minister a ni leh bawk a ni. MLA nilai R. Lalzirliana hi a tum sarihna atan (tum khat Congress Party ticket-in Kolasib-ah a tla tawh) kumin MLA inthlanah MNF ticket-in a ding leh dawn niin a lang a, Aizawl North-I Bial-ah a ding dawn nia hriat a ni.