State Disaster Management Authority thukhawm

Mizoram State Disaster Management Authority chu nimin khan Chief Minister Zoramthanga hova thukhawmin kumin-a an hmalakna te, an hmachhawp te leh tunhnaia hmun hrang hranga leilung chhiatna thleng mek an hmachhawn dan te an sawiho.

He thutkhawm CM Conference Hall-a neih ah hian DM&R changtu Secretary, K. Lalrinzuali chuan kum kal meka hmalakna tlangpui a tarlang a, kumtir lama State Level Mega Mockdrill neih a nih thute, Aapda Mitra Scheme hnuaia Volunteer training mi 500 pek thar an nih thu leh insurance tihsak vek an nih thute, Tlabung leh Sairang-a Safe Shelter building sak tharte chu hawn mai theih tawh an nih thute a tarlang a. India ram puma hman theih chhiatna leh rikrum thila phone-a biak mai tur Emergency Response Support System No-112 chu chhun zan zawma vil a nih thu leh mipuite pawhin he number hi accident, kangmei leh tanpui ngaihna rikrum thil an tawh palha an biak mai theih hi hmang tangkai deuh deuh se an duh thu a tarlang a ni.

Vaivakawn Zohnuai kawngpui leh a chhehvel leimin in a tihbuai mek chungchang leh Tlabung RD Block chhunga tuilian leh leimin vanga harsatna tawh mekte chungchang pawh he thutkhawm ah hian sawiho a ni a. Vaivakawn Zohnuai leilung awmdan hi tuna a tihnep theihna tur chi (short term mitigation) hmalakna chi hrang hrang kalpui nghal a nih bakah nakina tha taka kawngpui kaltlangtir leh theihna tura ruahmanna siam a ni a. He ruahmanna hi National Disaster Management Authority-ah thlen tur a ni.

Tlabung leh a chhehvel ah hian nimin zing dar 9:00 thlenga report danin tuilian vangin chhungkaw 252 leh leimin vangin chhungkaw 2, an vaiin chhungkaw 254 te hmunhim lama sawn chhuah an ni tawh a. An lo chen lailawkna tur hi Lunglei Deputy Commissioner leh Tlabung SDO te hmangin chak taka ngaihtuah nghal a ni a, harsatna dang heng buhfai supply te, Power Supply te, inbiakpawhna lamte a thlen belh loh nan a theih ang anga hmalakna neih zui mek a ni. Lawngtlai District khawthlang lamah pawh tuilian vanga harsatna a awm nia hriat a ni a, District Disaster Management Committee atanga report ngaihchan mek niin a tul anga hma la nghal tura inbuatsaih a ni bawk.

He thutkhawm ah hian DM&R changtu Minister leh State Disaster Management Authority-a Vice Chairman Lalchamliana bakah CEO leh Chief Secretary Dr. Renu Sharma IAS te telin SDMA Member dangte an tel bawk a. Mizoram State Disaster Management Plan, 2023 leh District hrang hrangte Disaster Plan, 2022 te an pawm (approved) bakah SDMA Work Plan, 2023 leh Purchase of Disaster Management Equipments proposal te chu a pawm bawk a ni.