Mizoram-a raltlan lut zingah zirlai 8119 an awm mek

Mizoram pawn atanga sahimna zawnga Mi-zoram-a raltlan rawn lut zingah zirlai 8119 te chu Mizoram sawrkarin a enkawl mek.

School Education Minister Lalchhandama Ralte chuan nimin khan Aizawl Press Club-ah thuthar thehdarhtute kawmin School Education Department hnuaia hnathawh thenkhat a tarlang a. Education Minister chuan tunah hian kan ram thenawm Myanmar leh Bangladesh atanga ratlan zingah zirlai thahnem tak an awm mek thu leh Myanmar atanga ratlan zirlai 6366 leh Bangladesh atanga raltlan zirlai 250 an awm bakah, Manipur raltlan zirlai 1503 awm bawk tih sawiin, an vaiin raltlan zirlai 8119 te chu Mizoram sawrkarin a enkawl mek tih a sawi a. “Heng raltlan zirlaite hi a thlawnin uniform leh zirlaibute pawh pek an ni. Manipur atanga Mizo-ram a rawn raltlan zirlai 1503 te pawh hi sikul luhtir an ni a, May ni 24-ah khan hemi atan hian Education Department chuan School hrang hrangte chu an huamchhunga mite sikul luhtir turin lehkha thawnin a lo hriattir tawh a ni,” a ti bawk.

Hei bakah hian Zirlaiten hnam thinlung an put nan leh Pathian rinna leh zahna an neih theih nan School-ah 'Ro min relsak ang che' tih hla chu sak thin tur tih a nih thu leh  zirna In-ah tha taka zawm mek a ni tih Minister chuan sawiin, Zirlai ten Mizo hnam nun an hriat nan te, an tet lai atanga Mizo hnam nihna zahpui lova an nunpui theih nan ‘Zonun’ tih chu Class VI, VII leh VIII-ah zirlaibu ah hman a nih thu a sawi bawk.

Education Department-in hnam tana theih-tawp a chhuahna pawimawh tak pakhat chu Mizo tawng dik humhalh leh tihhausakna tur kawnga hmalakna a nih thu pawh Minister chuan sawiin, hemi kawngah hian Mizo Language Development Board (MLDB) din a nih thu a sawi bawk. Heng bakah hian Minister hian zirna kawnga sawrkar hmalakna hrang hrang a tarlang bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar