Sericulture Minister Er. Lalrinawma’n Government Muga Grainage Centre a tlawh

Sericulture Department hnuaia Muga Pangang (Muga Silkworm) chi siamna hmunpui, Durtlang-a Government Muga Grainage Centre chu nimin khan Sericulture Minister Er. Lalrinawma chuan a hmunah tlawhin a enfiah.

Nimin-a helai hmun a tlawhna ah hian Sericulture Minister Er. Lalrinawma chuan Sericulture Department hnuaia hmasawnna hrang hrang hmuh tur a awm leh District thar a Pisa-te hawnfel a ni chu lawmawm a tih thu sawiin, Department hlun leh ngelnghet tak a nih anga hmunhma tha leh belhchian dawl hmalakna a awm chho zel chuan hmabak eng tak a nei tih a lantir a ni, a ti a. Sericulture kaltlanga thil dehchhuahte chu a hralhna kawnga buaina awm lo a nih bakah kan ram sik leh sa mil zawng tak a nih thu sawiin, tam zawk tharchhuak thei turin pangang khawitu kan pun zel a ngai a, a thatna vawrhlar leh inzirtir kawngah tan kan lak deuh deuh a tul thu a sawi bawk.

He hunah hian Sericulture Department changtu Secretary C. Lalrosanga chuan tunhnaia Sericulture hmasawnna tam tak hmuh a ni chu phurawm a tih thu leh farmer tam zawk an awm belh ngei a beisei thu a sawi a. Mamawh leh tul angte Department bakah Department dangte nena thawhhona (convergence) kaltlanga kalpui theih dan dap zel a tul thu a sawi a. Sericulture Scientist Dr. Lalthlamuana Pachuau chuan Mizorama Muga pangang khawi dan chanchin tlangpui sawifiahin, Sawrkar laipui a phur thu leh Muga pangang chi pawh an rawn ngen anga thawn a nih thu a sawi a. Eizawnna atana tlak leh farmer-te khaichhuah theihna tha tak a nih thu a sawi bawk.

Muga Pangang te hi khawvelah India hmarchhak State-ah chauh an awm thei a, tun dinhmunah Muga Pangang Seed Cocoon man hi a chi tur atana lei chuan pakhat Rs. 3/- a ni a, Laduang tur atana lei a nih chuan Rs. 1.90/- man a ni a. Muga pangang tui Kg 1 man chu Rs. 14,000/- niin, Muga Silk la duang Kg khat man chu Rs. 28,000/- vel bawr a ni. Mizoram-ah hian Muga pangang te hi a ram tla awm nualin, Bul leh Nauthak hnahte hi an chaw a ni a, heng thingkungte hi Mizoram hmun tinah hmuh tur a awm a. North East phai khaw lumah nipui laiin Muga pangang khawi hi a hlawhchham thin a, Mizoram-ah erawh chuan tha takin khawlum lai pawhin a khawi theih a ni.

Central Silk Board lam pawhin Mizoram that dante hriain Muga pangang chi siam programme an rawn nei a, tun tumah hian pangang tui engemaw zat tharchhuah theih beisei a ni a. Heng pangang tui tharchhuahte hi Mizorama pangang khawitute tana duan a nih bakah phai lam atanga ngenna a a awm nual bawk avangin thawnchhuak tura ruahmanna neih a ni a. Sericulture Department leh Mizoram University-te chuan kumin August ni 4 khan Sericulture tih hmasawnna tur lam hawi thawhdunna thuthlung, Memorandum of Understanding (MoU) an ziak a ni.