Champhai-ah GNM School thar hawn a ni

Health Minister Dr. R. Lalthangliana chuan nimin kha Champhai-ah Mizoram-a General Nursing & Midwifery (GNM) Zirna In pathumna, General Nursing & Midwifery (GNM) School chu a hawng a, India Covid-19 Emergency Response and Health Systems Preparedness Package Phase-II (ECRP-II) kaltlanga Rs. 13,46,40,800/- senga Critical Care Block, District Hospital Champhai sakna tur lungphum a phum bawk.

Hemi puala inkhawm neih ah Dr. R. Lalthangliana chuan GNM School, Champhai leh Critical Care Block ruhman tur te chu Health kaihhnawih hmasawnna ruhrel pawimawh tak an nih thu sawiin, thalaite zirna leh eizawnna kawngah leh mipui hriselna kawngah hmasawnna nasa tak a thlen ngei a beisei thu a sawi a. Mizo Nurse te hna an thawk tha in India ramchhung leh foreign hmun hrang hrangah te an inzarpharh a, an chhuanawm takzet a ni tiin, nursing line tih hmasawn zel pawh Sawrkarin a ngai pawimawh a, kumin Julty 31-a Council of Ministers Meeting chuan Directorate of Nursing din a rem tih thu sawiin, hei hian Nursing lamah hmasawnna tam tak a thlen ngei dawn a ni, a ti bawk.

GNM School, Champhai hi Lunglei leh Kolasib hnuah Mizoram-a GNM zirna In hmasa ber niin Inspection pawh paltlang tawh a ni a, kumin Academic Session tharah hian Class tan nghal tum niin Batch khatah Seat 20 a awm dawn a, kum 3 chhung zir tur niin Class XII Arts, Science leh Commerce zir chhuak, 40% mark hmu chin ten an dil thei a. Indian Nursing Council in a bituk angin August ni 1 atanga September ni 30 chhungin Admission process kalpui a ni dawn a ni.

Champhai District Hospital-a Critical Care Block din tur hi damlo na zual - Emergency, Surgical & Intensive Care te enkawlna tur a ni a, khum 50 awm theihna tur a ni bawk.