Development of Village Based Eco Tourism lung phum

Khamrang-a Development of Village Based Eco Tourism siamna tur lungohum chu nimin khan Tourism Minisster Robert Romawia Royte chuan a phum.

Khamrang Community Hall-ah lungphum phumna puala inkhawm neih ah Tourism Minister chuan Mizoram in Responsible Tourist Policy a neih hnuah Khamrang khua-a Village Based Eco Tourism siamna tur lungphum a phum thei chu a lawmawm takzet tih sawiin, India rampum huapa Tourism lama Mizoram kan lan ve theihna a nih ngei a beisei thu a sawi a. Sawrkarin tih tur hmachhawp a neihte leh tih tur a tih te chu Chief Minister kaihhruaina hnuaiah chak taka tihpuitlin zel a ni tih sawiin, Khamrang khua pawhin a hlawhtlinna an chang thei chu lawmawm a tih thu a sawi a, duhsakna a hlan bawk. Tourism Minister chuan Mizo kan ni tih sawiin, “Kan Culture, kan Sakhuana te humhim chungin Tourism chu kalpui zel a ni dawn a. Kan ram leh hnam Tourism kaltlangin kan phochhuak zel dawn a ni,” a ti a. Responsible Tourism leh Village Based Eco Tourism thil tum chu Project awmna khua khaw mipuite'n a hlawkna lo hlawkpui tura din a nih angin Khamrang khua chu a hmasa ber an nih angin a hlawhtlin nana theihtawp chhuah turin a chah bawk.

Khamrang-a Tourism tihhmasawnna tur sum hi Ministry of Development of North Eastern Region (DoNER) hnuaia North East Special Infrastructure Development Scheme (NESIDS) atangin cheng nuai 800 hmuh a ni a. Mizoram-a Responsible Tourism flagship project hmasa ber siam tum niin kum 2 chhunga zawhfel tura ruahman a ni a. Hmalakna-ah hian component hrang hrang - Khamrang Village, Khamrang puk, Lungkulh, Bak Puk Trekking, Lungkhawthlir, Thangruma hmun te awlsam leh nuam zawka an tlawh theih nana siam tum a ni.

He hunah hian Tourism Department Director Saitluanga chuan Mizoram Tourism chungchang Presentation neiin Tourism Department hi April 24, 1987 atangin Officers leh Staff 34 te nen mahni-a inrelbawl ve tura tih a ni a. September 27, 1987-ah Chanmari, Aizawl-ah mi In luahin Jt. Director kaihhruaina hnuaiah Department pangngai angin bul tan a ni leh a. Department pangngai anga a function tan lai hian Tourist Lodge 3- Saitual, Chaltlang leh Kolasib Tourist Lodge te a enkawl a ni. Kum 28 hnuah mahni pualin Directorate Building a ni tawhh a ni.

Nimin-a he hun hmanna ah hian khual zahawm bialtu MLA K. Laldawngliana chuan Reiek, Hmuifang leh Thenzawl dawtah Khamrang khuaah khualzinte hmunpui ni tura Sawrkarin Project lian a siam chu lawmawm a tih thu a sawi a. Tourism Development Board Vice Chairman TC. Pachhunga pawhin he project hi Mizoram in Tourism lama hma kan sawn zelna tur atana hmahruaitu anih ngei a beisei thu a sawi bawk.