Serchhip District-a hri danna pek beihpui thlakna IMI 5.0 kalpui turin a hawnna neih a ni

Hri danna beihpui thlâkna, Intensified Mission Indradhanush (IMI) 5.0 chu nimin atang khan Serchhip District-a kalpui turin Serchhip District Addl. DC James Lalnithanga chuan a hawng a, IMI 5.0 kalpui chhung hian naupai leh kum 5 hnuailam an kum milpui zela hri danna lak tur la la lo te hnenah hri danna pek beihpui thlak a ni ang. 

Serchhip District-a Intensified Mission Indradhanush (IMI) 5.0 hawnna hi Serchhip CMO Conference Hall-ah nimin khan neih niin Serchhip Addl. DC James Lalnithanga chuan Serchhip District-ah mumal taka hri danna pek kalpui a ni chu lawmawm a tih thu sawiin, Sawrkar laipuiin Sentut leh Sentet (Measles & Rubella) natna umbo tura beihpui a thlak avangin Vawiin-ah hetiang hun hi kan lo hmang ta tih a sawi a. Vaccine la lo an awm zel chuan heng hri te hi a reh tak tak dawnlo tih sawiin, Vaccine la tur ten an lak ngei theihna tur leh he beihpui thlakna hi a hlawhtlin ngei theihna tura hma la turin thawktute a fuih bawk.


IMI 5.0 kalpui tur hawnna hun hi Serchhip SMO leh District Immunization Officer (DIO) Dr. Lallawmkimi Chhakchhuak chuan kaihruaiin inlawmna thu a sawi bakah IMI 5.0 awmzia leh kalpui tum a nih dan hrang hrangte a sawi a. Mission Indradhanush hi kum 2015 April thla atang khan kalpui tan niin kumin a kalpui tur hi a tum 5-na a ni a, Sawrkar laipui hmalakna niin Mizoram-ah pawh District tinah neih tur niin Nu Naupai leh naupang kum 5 hnuailam zawng zawngin an kum milpui-a hri danna an lak tur ang lak loh an neih te zawngchhuakin tun thla ni 12 thleng khian hri danna pek beihpui hi thlak a ni dawn a. Hemi rual hian kumin hian Sentut leh Sentet (Measles & Rubella) te chu tinzawn berah neih tur niin heng natna te hi a lanchhuah dân nasa ni lo mahse a hnu-a harsatna hrang hrang thlen thei a ni a. He natna pahnih te hi Vaccine hmanga invên theih anih avângin India sawrkar chuan kumin December thla ah hian ûmbo turin ruahmanna a siam a, hemi bawhzuina atan hian nasa zawka kalpui a ni dawn a ni.

Intensified Mission Indradhanush 5.0 hi Serchhip, Thenzawl leh Chhiahtlang-ah te kalpui phawt tura ruahman niin amaherawh chu sawrkar laipui ruahman angin District pumah kalpui zui tur a ni dawn a. He hmalakna kalpui tur hian kumin July 20 khan District chhunga ASHA te chuan training nei tawhin hemi hnu hian ASHA te hian an bial theuh ah In tin tlawhin Vaccine la lo an awm leh awm loh hi an lo enfiah vek tawh a. An kalna apiang chhinchhiah zelin naupai lai leh kum 5 hnuailam zingah an kum milpui-a Vaccine an lak tur ang la lo te chu tunah hian Vaccine hi pek an ni dawn a. Vaccine pek tur hi a inan loh avangin tun tumah hian a thawh khatna atan Vaccine hi pein September 11-16 chhung hian a thawh hnihna pek leh tur a ni anga, October 1-14 chhungin a hnuhnung ber tur pek leh a ni ang.

Serchhip SMO chuan naupang kum khat (1) hnuailam te hnenah hian Vaccine pek tur chi nga (5) a awm thu leh kum 5 thlenga pek theih chi hnih (2) a awm thu sawiin, kum 7 thlenga pek tur chi khat a awm bawk thu a sawi a. Heng te hi a hun takah nausen te pek thin a pawimawh thu sawiin, tun tumah pawh hian Vaccine lak hun zingah la la lo an awm a nih chuan mahni bialtu Sub-Centre ah theuh Vaccine hi lak theih a nih thu a sawi bawk.

IMI 5.0 hi Mizoram-a khaw 190-ah a thawh khatna atan kalpui a ni dawn a, Hri danna hi National Health Mission hnuaiah Universal Immunization Programme-ah natna chi 11 vêng tûrin Nu naupai leh naupang ah te Vaccine pêk a ni a. Hri danna hmang hian khawvêl ah Smallpox (Zawnghri) ûmbo a lo ni tawh a. India ram chu Zenghri leh Nu leh nausen Sakawrekhrik (Tetanus) awm lohna-ah puan a lo ni tawh bawk a. Nausen thihna (Infant mortality) leh Nu naupai lai thihna (Maternal mortality) pawh hridanna pêk avângin nasa taka tih tlêm a lo ni tawh bawk a ni.

Comments

Popular News (Last 30 Days)

LPG man bithliah thar