State pawn-ah Isabella Wine hralhchhuak dawn

Hnahlan Winery atanga siamchhuah Isabella Wine chu Mizoram pawn-a hralhchhuak turin nimin khan MoU ziah a ni.

Mizoram pawn-a Isabella Wine hralh tura inremna hi Planning & Prog-ramme Implementation Office-ah Hnahlan Grape Farming & Processing Co-Op Society Ltd. leh RR Sales, Delhi te chuan an ziak a, Hnahlan Grape Farming & Processing Co-Op Society aiawhin an Chairman C.Vanlalhriata leh RR Sales, New Delhi aiawhin V. Lalrindika, Director, Bussiness Development, RR Sales, New Delhi in hming ziak bawkin MoU ang hian Isabella Wine hi RR Sales te hian Delhi leh a chhehvel-ah zawrhna an zawng anga, lei zat tur leh a man tur tihfel la ni lovin kum 5 chhung atan inremna hi an ziak a ni.

Kumin 2023 hian Hnahlan leh a chhehvel ah Grape seng mek a ni a, tun dinhmun ah quintal sang chuang an seng tawh a, Hnahlan Winery-ah hian kum hlui lama wine siamsa leh kumin a mi nen litre nuai hnih chuang hralh tur an nei tura beisei a ni. Hnahlan leh a chhehvel ah hian Grape huan siamthar an pun mek bakah Mizoram sawrkar hmalakna in Grape huan tuaithar (Rejuvenation project) buaipui mek a ni bawk a. SEDP leh FOCUS atangin grape chingtu ten tanpuina an dawng bawk a ni. Kum 2010 a hawn Hnahlan Winery pawh production capacity tihlen bakah khawl leh hmanraw changtlung leh thar zawk nen a thuam thar tum a ni bawk.

Hnahlan Grape Farming & Processing Co-Op Society Ltd. hian kumin hian Grape rah hi kg. ah Rs. 60/- in kg. 90,000 vel an lei tawh a, Grape rah la lei loh hi engemaw zat ala awm bawk a. Mizoram-ah Grape wine zawrh phalna license nei mi 40 vel an awm mek a, chu'ng zingah chuan dawr siam lo engemaw zat awmin License nei zingah dawr siam mi pali/panga velin Hnahlan Winery an dàwr thin a, anni ringawt chuan Grape Wine siam tawhte an lei séng lo, hei vang hian Hnahlan khua hian Wine hralh kawngah harsatna an tawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man