Serchhip District Bawrhsap thar in tlawmngai pawl leh MJA hruaitute a kawm

Serchhip District Bawrhsap thar David Lalthantluanga chuan nimin khan Serchhip District-a tlawmngai pawl hrang hrang hruaitute leh thuthar thehdarhtute kawmin District hmasawnna tura hmalakna tur pawimawh hrang hrang a sawipui a, thawhhona tha tak an neih a beisei thu a sawi bawk.


Serchhip District Bawrhsap thar hian nimin khan Serchhip DC Meeting Hall-ah tlawmngai pawl hrang hrang leh MJA Serchhip District hruaitute hi kawmin Serchhip District-a Bawrhsap hna a zawm hnuah a vawikhatna atan Serchhip District chhunga tlawmngai pawl hrang hrang aiawhte nen inkawmna hun an hmang thei chu lawmawm a tih thu a sawi a. Kohhran leh khawtlang hruaitute chu sawrkar kut ke pawimawh tak an ni a, heng pawl hrang hrang te leh mipui mimir tawiawmna tha hi District hmasawnna atana pawimawh ber te zinga mi a ni, a ti a. Kan hma lawkah Mizoram in Assembly inthlanpui kan hmachhawn dawn thu pawh sawiin, chuta tan chuan 2nd Special Summary Roll Revision a kal mek a nih thu leh Serchhip District chhunga vote thlak rual tawh phawt chuan vote an thlak theih nan te, inthlanna felfai leh thianghlim a awm theihna turin tlawmngai pawl leh mipui te thawhhopuiah a sawm bawk a ni.

Serchhip District-a National Highway-54 laihzauh leh siamthat hna thawh mek a nih thu pawh Bawrhsap chuan sawiin, he kawngpui siam mek avang hian khaw tam takah nunphung a buai hle tih an hriatpui thu a sawi a. Kawng tha nei thei tur chuan harsatna engemaw chen tawh loh theih loh a nih avangin tuar hram hram turin mipui te a ngen a. Sawrkar laipuiin kumthar February thla chhunga hna hi zo vek turin Contractor te a hriattir thu leh a hmawr an bawk tep tawh thu a sawi. Bawrhsap chuan kawngpui siam mek chungchangah hian zangnadawmna sum la thei tura assessment tih loh palh lo la awm te pawh chinfel niin heng mi te hian zangnadawmna (compensation) hi an dawng ngei dawn tih he thutkhawm ah hian a sawi a. Bawrhsap kalta te an lo tawiawm tawh ang bawkin Serchhip mipuite thawhhopuiah Serchhip DC thar chuan a sawm a. Kan hma lawka Independence Day lo awm turah pawh tel theuh turin mipuite a sawm bawk a ni.


He hunah hian Serchhip Addl. DC James Lalnithanga pawhin Serchhip District chu ram laili a awm, ramdang leh hnamdang nen pawha inpawlh tam lutuk lo a ni tih sawiin, District nuam tak a ni dawn nia an hriat thu a sawi a. Serchhip District-ah raltlan engemaw zat an awm thu pawh sawiin, heng mite lo dawnsawn dan kan hriat a pawimawh thu leh ramdang mi te Electoral Roll-a thun an nih lohna tura kan fimkhur tlan a tul thu a sawi a. Serchhip DIPRO Lallnunmawii pawhin an hmalakna te a tarlang bawk a ni.

Nimin-a thutklhawm ah hian tlawmngai pawl hrang hrang leh MJA aiawha tel te chuan an pawl hmalakna leh an dinhmun tlangpui an sawi a, Ser-chhip Sub-Hqrs. YMA chuan an huamchhhungah YMA Member sing 4 vel awmin YMA Branch 74 an awm thu an sawi a. MUP Serchhip District in an huamchhungah Branch 71 awmin Member 7013 an awm thu sawiin, MZP Hqrs. Serchhip in Branch 11 leh Sub-Hqrs. 7 an neih thu an sawi a. MHIP Sub-Hqrs. Serchhip in Branch 82 an neih ah member 21,106 an neih thu sawiin, MJASer-chhip District pawhin Member 14 an neih mek thu an sawi bawk a ni.

Serchhip District Bawrhsap thar David Lalthlantluanga hi kum 1998 khan Mizoram Civil Service (MCS)-ah inziak tlingin nikum khan IAS-ah hlankai niin AGMUT Cadre 2014 Batch-ah dah a ni a. IAS-a a kaisan hnu hian Lawngtlai-ah District Bawrhsap hna chelh tura dah a ni a, tunhnai khan Serchhip District Bawrh-sap hna chelh tura rawn dah leh niin hna pawimawh hrang hrang a lo chelh tawh bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar