Assam leh Mizoram ramri buai chingfel tura Minister-te inbiak hun a hnaih rin a ni - Home Minister

Mizoram sawrkar-a Home Minister Lalchamliana chuan Assam leh Mizoram ramri buai chingfel tura State pahnih Minister-te inbiak leh hun tur a hnaih a rin thu sawiin, Assam in an ram anga an hauh khaw 62 te Mizoram chhunga mi a nih thu a sawi bawk.

Home Minister Lalchamliana hian thuthar thehdarhtute zawhna chhangin tunhnai khan Assam Home Department-a Additional Secretary chuan Mizoram Home Department hotute rawn bia-in Minister pahnih inbiakna chhunzawm leh hnaih ni se tih a rawn rawt tih a sawi a. Assam Border Area Protection and Development Minister Atul Bora hun neih remchan dan an dap mek thu leh Assam sawrkar thu an nghak mek niin a sawi a. Ramri buai chinfel tuma an inbiak lehna tur atan Mizoram sawrkar chuan tuna Assam-in an ram anga a hauh mek khaw 62 chu Mizoram chhung ami a nih thu sawiin, heng khaw 62-te hi Mizoram chhunga rinluh turin lehkha an thehluh tawh thu Home Minister Lalchamliana chuan a sawi a. Hei hi Assam sawrkar lamin an la rawn chhang lo niin a sawi bawk.

Home Minister Lalchamliana hian Mizoram leh Assam ramri-a khaw 62 te chu Bengal Eastern Frontier Regulation (BEFR) 1875-ah chuan Mizoram in a huam chin anga tarlan a nih thu lo sawi tawhin, Mizoram chuan BEFR hnuaia Inner Line Reserved Forest square miles 509 chu ramri ah a pawm a nih thu a sawi a. Hetihlai hian Assam erawh chuan kum 1933-a India Map Survey anga ramri chu a Constitutional Boundary a nih thu a sawi thung a. Mizoram in a huamchin khaw 62 te chu February thla khan Assam sawrkar ah thehluh a ni tawh a ni.

Mizoram leh Assam State ramri buaina hi hun engemaw chen kalta atanga lo intan tawh kha niin ramri-ah tharum thawhna thleng zeuh zeuh mah se, July 26, 2021-a Vairengte khaw dai a Mizoram Police leh Assam Police an inkah hma kha chuan State pahnih te ramri buai chinfel tum tak taka inbiakna a la awm meuh lova. Assam Police mi 5 laiin an thih phahna kha inkahna a thlen hnu khan inbiakna hi neih a ni chho ta a ni.

Comments

Popular News (Last 30 Days)

LPG man bithliah thar