Serchhip District-ah chhiatna lian thleng lovin mipuite fimkhur turin thuneitu ten an chah
Serchhip DC Office-a DM&R Branch, District Emergency Operation Centre (DEOC) ni bawk-a thawktute chuan LENKAWL zawhna chhangin tunhnaia ruahsur nasa kaihhnawih ah hian nimin thleng khan Serchhip District-ah chhiatna liantham thleng a awm thu dawn an la nei lo tih an sawi a, leimin leh tuilian avanga mahni In chhuahsan ngai leh hmun him lama thiarchhuah ngai report an la dawn loh thu sawiin, tunhnai lawka Serchhip Dinthar Vengsang-a In pakhat chim chu chhiatna thleng lian ber a ni tih an sawi a. Hmun thenkhat ah leimin tenau deuh leh hemi in kawng a hnawh te a awm thu sawiin, heng te pawh hi a theih anga thenfai zel a nih thu an sawi a. National Highway-54 pawh Serchhip chhimlam-ah leimin in nimin thleng khan a hnawh thar a awm thu sawiin, heng te pawh hi kawng enkawl mektu ten a thenfai hna an thawk zel tih an sawi a, leimin tenau report hmun 8-ah an dawn thu an sawi a ni.
Hetihlai hian Serchhip DC Office chuan thuchhuah siamin India Meteorological Department, Ministry of Earth Sciences, Government of India-in August 7, 2023-a Special bulletin a tihchhuah ah ruah nasa tak sur chhunzawm zel tur anga a sawilawk avangin mipuite fimkhur tur leh inkaihhruaina te zawm turin an hriattir a. Mahni In leh lo ten thli leh ruah a dawl theih nan a tul ang a thawmthat ngai laite thawmthat tur a nih thu te; Tui paihna leh tuiluan kawr te mumal taka siam tur a nih thu te; Ruahsur avanga leimin thei laite hriatchian a fimkhur tur a nih thu te tarlangin, Tui hmun, lui leh ramhnuai-ah te kal loh a tha tih an tarlang a. Ruah vanga Eng (power supply) neih loh theih a nih avangin Electric hmang thil te a charge lawk theih apiang charge lawk a that thu leh rikrum thila mamawh tur Torch light, Emergency light, First Aid kit, Tui thianghlim leh eitur te lo inrinlawk a that thu pawh tarlangin, Ralkhel leh chi-ai lovin tanpui ngai an awm chuan a tul dan ang zela che chhuak tura inbuatsaih tur a nih thu an tarlang a ni.
Hei bakah hian thudik lo leh thu belhchian dawl lo thehdarh loh tur a nih thu pawh tarlangin, a lo thehdarh an awm chuan, The Disaster Management Act, 2005. No. 53 of 2005, Section-54 hnuaia hremna dan ziak angin District Magistrate in an chungah action a la ang tih an tarlang a. Chhiatna a lo thlenin Serchhip DC Office-a District Emergency Operation Centre (DEOC), Phone No. 9862116104 chu engtik lai pawhin biak theih reng a ni tih an tarlang a ni.
Comments
Post a Comment