Iron Rod buk nan Electric Weighing Machine hman ngai

Serchhip District Bawrhsap chuan Serchhip District chhunga Iron Rod Dealer zawng zawngte chu Electric Weighing Machine chauh hmang ngei turin a hriattir.
Serchhip District Bawrhsap hian August 7, 2023 khan hriattirna tichhuakin Ser-chhip District mipuiten Iron Rod (TMT Bar) buk tling leh dik ngei an lei theih nan Serchhip District chhunga Iron Rod dealer zawng zawng te chu August 14, 2023 (Thawhtanni) atang hian Electric Weighing Machine chauh hmang ngei turin a hriattir a. Controller of Legal Metrology, Govt. of Mizoram chuan August 20, 2020 khan Iron Rod dealer reng reng chuan September, 2020 ralhma ngeiin Electronic Weighing Machine an hmang vek tur a ni tih Order a chhuah tawh thu leh Secretary to the Govt. of Mizoram, FCS&CA Department pawhin March 24, 2023 khan Iron Rod hralh nan a buk a buk chauh phal a nih thu leh Legal Metrology Wing, FCS&CA Department in an endik thlap Electronic Weighing Machine chauh hman tur a nih thu a chhuah tawh bawk tih tarlangin, heng Order leh Notification te bawhzui hian he hriattirna hi tihchhuah a ni.