Mizoram-a Supply Centre hrang hrangah Furpui chhung daih tur buhfai a awm - Supply Minister

Supply Minister K. Lalrinliana chuan Mizoram-a Supply Centre hrang hrangah Furpui chhung daih tur buhfai a awm thu sawiin, Gas Online delivery chungchangah Gas Agency te chu online a Booking a awm chuan Gas Home delivery kalpui vek tura ngaih an nih thu a sawi bawk.

Nimin-a Aizawl Press Club-a thuthar thehdarhtute a kawmna ah Supply Minister K. Lalrinliana chuan Mizoram-a Supply Centre hrang hrangah Furpui chhung daih tur buhfai a awm thu leh khaihlak lova buhfai sem zel a la nih thu a sawi a, Mizoram in thla khata buhfai a mamawh zat chu Quintal 9,90,000 a nih laiin Sawrkar laipui atangin Quintal 54,000 chuang dawn thin a nih thu leh buhfai indaihlohna chu Open Market Procurement hmanga lei thin a nih thu a sawi a. Furpui chhunga kawng chhiat thulha buhfai dahkhawlna atan hmun hrang hrangah Supply Centre dah a nih thu leh Furpui daih quintal 9,88,781 dahkhawl mek a nih thu a sawi bawk.

Kum 2020 March chawhnu lam atanga Mizoram Sawrkar-in lockdown a kalpui tak hnuah Ration buhfai te a thlawna sem a nih thu pawh Minister chuan sawiin, buhfai quintal 27177.1 sem a nih thu a sawi a, Pradhan Mantri Garib Kalyan Yojana (PM-GKAY) chu May, 2020 atangin Mizoram-ah kalpui a nih thu leh NFSA beneficiary te thla tin mi pakhat zelah buhfai kg. 5 pek thin an nih thu bakah Atma Nibhar Bharat hnuaiah Buhfai, Chana leh Dal te sem a nih thu a sawi a. Mizoram sawrkar in AAY chhungkua te hnenah January, 2019 atanga Vawiin thlengin chini (sugar) thla tin chhungkaw khatah kg. 1 zel a man tlawm a sem thu te, Central Sponsored Pilot Scheme – ‘Fortification of Rice & its distribution under Public Distribution System’ chu Mamit District ah kalpui a nih thu te a sawi bawk.

Supply Minister chuan LPG Home Delivery chu September 2013 atang khan Pilot Basis in College Veng, Aizawl-ah tih tan a nih thu pawh sawiin, tun dinhmunah Gas Distributor te chu Consumer ten Online booking an ti anih chuan Hme Delivery kalpui tura tih vek an nih tawh thu a sawi bawk a ni.