Inthlan ah kan sawrkar leh ngei dawn, MNF in bial himsa 10 kan nei - MNF President

MNF Party President Zoramthanga chuan MNF in bial him sa 10 an nei nia sawiin, “Eptute chuan Bial 30 atangin sawrkar siam turin an rawn bei dawn a, an tan beisei tur a tam lo hle ang,” a ti a, MNF chu inthlan ah an sawrkar leh ngei dawn niin a sawi bawk.

Nimin-a MNF Party in Aizawl Mizo Hnam Run Inkhawm an buatsaih ah MNF President Zoramthanga chuan mi thar lawmlutin inthlan ah an sawrkar leh ngei dawn tih a sawi a, tunhma lamah MNF chuan Bial 5 hloh sa tlukin inthlan an hmachhawn thin tih sawiin, “Tunah erawh chuan Bial 10 (Tlabung, East & West Tuipui, Thorang, Tuichawng, Lawngtlai East, Lawngtlai West, Mamit, Hachhek, Chawngte leh Dampa)-ah ZPM leh Congress tih tham an awm lo,” a ti a. “Eptute chuan Bial 30 atangin sawrkar siam turin an rawn bei dawn a, an tan beisei tur a tam lo hle ang,” a ti.

MNF President chuan ‘Congress hunah an chhe vek, PC leh MNF hunah an chhe vek’ tia mipuite fuihtu ZPM thuvawn chu ‘MNF leh Congress ni lo’ tih a nih thu pawh sawiin, “An thusawi awihtu mi tlem te chu an innghahna awmchhun a ni mai. East Tuipui, Khawzawl, Saitual, Lengteng, Kolasib leh Serlui bial han en ila an tlinna tur a vang hle. Aizawl-ah pawh en ila, an dinhmun a chhe sawt em em a ni. Candidate an set a, anmahni leh anmahni an buai a, an buai tulh tulh mai a ni. A tira sawrkar tum kha tunah chuan an thaw lian ngam tawh lo. Policy mumal an nei loh vang a ni,” a ti a. “Anni chuan pawl an sawn apiangin policy an thlak. Kalphung mumal an neih loh avangin candidate an siam a, an buai ta vek a ni. Hei vang hian MNF a sawrkar leh ngei dawn a ni,” a ti.

Mizoram pawn-a Zofa ten MNF sawrkar loh an hlau nia sawiin, “Burma, Bangladesh leh Manipur-a kan unauten hetah vote nei lo mah se, keini aiin MNF sawrkar a pian loh an hlau zawk. Kan Jerusalem-ah hian hnam thinlung pute sawrkar an mamawh a, tui anga nghet lote sawrkar a pian loh nan theihtawp chhuah an tum,” a ti bawk.