Serchhip-ah Draft Electoral Roll tlangzarhin hming thun thar turte tan dilna thehluh theih a ni

Kumin kumtawp lama Mizoram Legislative Assembly inthlanpui neih tur atana inbuatsaihna kal zelah kumin-a a tum hnihna atan Electoral Roll ennawn hna chu thawh tan a ni leh ta a, nimin khan Serchhip District-ah pawh Draft Electoral Roll tarchhuakin hming thun thar, paih leh siamthat bakah insawn duh tan hun hawn nghal a ni.

Serchhip District-a Electoral Roll ennawn hna thawh tur atan hian Serchhip District Bawrhsap leh District Election Officer David Lalthantluanga chuan nimin khan Serchhip DC Meeting Hall-ah Draft Electoral Roll hi tlangzarhin kumtin January 1-a kum 18 tling chin te lain Electoral Roll ennawn hna hi thawh thin a nih thu leh inthlanpui neih dawn kumah chuan tum hnih neih thin a nih thu sawiin, tun tum hi kumin a Electoral Roll ennawn a nih tum hnihna tur a nih thu a sawi a. Kumin January thla a Electoral Roll tarchhuah takah khan Serchhip District-a Assembly bial pathum (3)-ah Vote nei thei 53,388 an awm thu sawiin, Continous Updationm kalpui zel a nih thu leh kumin July 1 thleng khan mi 841 thun tharin mi 416 paih an nih thu a sawi a, kumin chhunga Vote nei punna hi 425 a nih tawh thu leh tunah hian Vote nei 53,813 an awm thu a sawi a. Little Flower Convent School-a Polling Station awm thin pakhat chu Govt. HSS Serchhip-ah dawn a nih dawn thu leh tunah hian pawm a nih tawh thu sawiin, Serchhip District-a Polling Station zawng zawng building hrang theuh ah a awm tawh dawn thu a sawi bawk a ni.


District Bawrhsap chuan tunkar mai-ah Serchhip District Bawrhsap hna rawn chelh a nih thu pawh he hunah huan sawiin, tunhma lamin Political Party, NGO leh khawtlang in thawhhona tha tak an neih thu leh thawhhona tha an neih zel a beisei thu a sawi bawk.

Draft Electoral Roll 2023 tlangzarh takin a tarlan danin Serchhip District chhungah Assembly Constituency 3 awmin Polling Station 88 a awm a, Vote nei mipa 26,118 leh hmeichhia 27,695, an vaiin 53,813 an awm a, heng bakah hian Service Voters 415 an awm bawk a ni. Assembly Constituency pathum zingah 26-Serchhip (ST) AC-ah vote nei thei tam berin vote nei mipa 9599 leh hmeichhia 10,810, an vaiin 20,409 an awm a, Polling Station 29 a awm bawk. 27-Tuikum (ST) AC-ah Polling Station 32 awmin Vote nei mipa 8345 leh hmeichhia 8498, an vaiin 16,843 an awm a, 28-Hrangturzo (ST) AC-ah Polling Station 27 awmin vote nei mipa 8174 leh hmeichhia 8387, an vaiin 16,561 an awm bawk.


Tun tuma Electoral Roll ennawn hna thawh turah hian October ni 1, 2023-a kum 18 tling chin India khua leh tui (citizen) dik takte tan Electoral Roll-a inthun thar dil theih a ni a, hemi rual hian hming siamthat ngai, paih ngai leh insawn duhte tan dil theih a ni dawn a, Draft Electoral Roll tarchhuah atanga August 31, 2023 thlengin dilna thehluh theih a ni. Heng dilna te hi ERO leh AERO ten enfiahin September 22, 2023 hmain zawhfel tur a ni anga, October 4, 2023-ah Final Electoral Roll tarchhuah a ni ang.

Nimin-a Draft Electoral Roll tarchhuah tak hi Political Party hrang hrangte hnenah a copy pek nghal an ni a, mipuite tan pawh bialtu BLO te hnenah en theih a nih bakah ERO leh AERO te Office-ah en theih a ni bawk ang.

Comments

Popular News (Last 30 Days)

LPG man bithliah thar