Mega Oil Palm Plantation Drive-2023 hmangin ‘Best Farmers Award 2023’ sem nghal a ni

Agriculture Department buatsaihin nimin khan Aijal Club-ah ‘Mega Oil Palm Plantation Drive-2023’ hman a ni a, Oil Palm chingtu hlawhtling thlanchhuahte hnenah ‘Best Farmers Award 2023’ sem a ni bawk.

Mega Oil Palm Plantation Drive-2023 hi Agriculture Minister C. Lalrinsanga chuan khuallian nia hmanpuiin sawrkar laipuiin an ruahman anga he Mega Oil Palm Plantation Drive hi Mizoram District tinah kar hmasa atanga hman a nih thu a sawi a. Oil Palm chingtute’n hlawhtlinna an hmu chho zel chu lawmawm a tih thu sawiin, Sawrkar laipui leh State sawrkar in Oil Palm plantation a ngaihpawimawh thu leh, State hmalakna hrang hrang te a tarlang a. Heng zawng zawng hlawhtlinna chu taimakna ah thui tak a innghat tih a sawi bawk.

He Mega Oil Palm Plantation Drive hi Dr. Lalrozama IAS, Agriculture Department Secretary chuan kaihhruaiin, Oil Palm ching hlawhtling mi pathum – Ramtinchawma (Nalzawl, Mamit District), Lallawmzuala (Serchhip, Serchhip District) leh F. Lalhlimpuii (Bairabi, Mamit District) te hnen atangin Oil Palm chin kawnga an tawn hriat ngaihthlak a ni a. Mizorama Oil Palm chin leh hmalak dan tlangpui Power Point Presentation hmanga ngaihthlakho a ni bawk. Heta tarlan a nih dan in India ram chuan ramdang atanga hriak ei chi (Edible Oil) a lakluh tihtlem nan Oil Palm chin kawngah hma a la thar a; Scheme thar, ‘National Mission on Edible Oils – Oil Palm (NMEO-OP)’ chu sum cheng vbc. 11,040 hman turin a ruahman a, Mizoram-ah pawh kum 2022 atangin he Scheme hmang hian hmalak ve a ni.

Mizoram-ah hian Oil Palm chin leh sawngbawl a nih theih nan December ni 2, 2004 khan ‘The Mizoram Oil Palm (Regulation & Processing) Act’ chu pawm a lo ni tawh a, chu Act hmang chuan kum tina tlangram loneih tihtlem leh hriak hmanga intodelh a nih theih nan hmalak chhoh a ni ta a, loneitute leh Oil Palm atana thawhpui (Partners Company) – Godrej Agrovet Pvt. Ltd. leh Ruchi Soya Industries Ltd. (Patanjali Foods Ltd. tia thlak) te nen thawhhona tha tak kalpuiin hlawhtlinna hmuh chhoh mek a ni.

Nimin-a he hun hmanna ah hian Oil Palm chingtu loneitu engemaw zat telin District hrang hrang atanga thlanchhuah te hnenah ‘Best Farmers Award 2023’ sem a ni a. Serchhip District atangin Lalremruata Royte, Serchhip Darnam Veng chuan ‘Best Farmers Award 2023’ hi dawngin ani hian Ha 3.56-a zau-ah Oil Palm chingin kung 509 a nei a, kum 2022-23 chhung khan quintal 75.47 a hralhchhuak a ni.