Serchhip-ah District Bawrhsap hovin AKAM hmawrbawkna ‘Meri Maati Mera Desh’ hman a ni

India ram zalenna champha vawi 75-na lawmna ‘Azadi Ka Amrit Mahotsav’ (AKAM) hmawrbawkna ‘Meri Maati Mera Desh’ chu nimin khan Govt. High School Serchhip-ah pawh District Bawrhsap David Lalthlantluanga hovin hman a ni.


Ramchhung hmun hrang hranga tun thla ni 9 atanga India ram zalenna champhaphak vawi 75-na lawmna kharna, Meri Maati Mera Desh puala nimin-a Serchhip-a hun hman ah hian District Bawrhsao David Lalthlantluanga chuan kalkhawmte chibai bukin, Meri Maati Mera Desh chu sawrkar laipuiin a ngai pawimawh hle a, India ram zalenna champhaphak vawi 75-na lawmna kal zelah a peng pawimawh tak leh kharna a ni, a ti a. India ram zalenna lawmin ram chhung dung leh vangah kumpui lingletin programme hrang hrang buatsaih a nih thu sawiin, “Vawiin-a programme bik hi India ram leilung nena inzawm tlat kan nihna te, he ram tana an theihna hlantu mi huaisen te chawimawina ni atan te buatsaih a ni,” a ti a. “He ram zalenna atana nun hlantute an hlu em em a, thangtharte hian kan ngaihhlut a, kan chawimawi an phu,” tiin, an hniakhnung zuia ram hmasawnna atana an theihna hlan turin mipuite a sawm bawk a ni.

He hun hi Serchhip DRDO Project Director HD. Lalpekmawia chuan kaihruaiin Serchhip Addl DC James Lalnithanga chuan report pe in Meri Maati Mera Desh chu March 2021 atanga bultan Azadi ka Amrit Mahotsav (AKAM) lawmna kal zela peng pawimawh a ni tih sawiin, Ram pumah a kharna hun inang tlanga hman tura ruat niin Serchhip-ah pawh hemi ang hian uar taka hun hman a nih thu a sawi bawk a. Serchhip SDO (Sadar) Rebecca Laldinmawii Hrahsel kaihhruaiin hemi puala Thutiam, Panch Pran Pran Pledge chu chham rual a ni bawk.


Nimin-a he hun hmanna ah hian Ser-chhip District Bawrhsap David Lalthantluanga hian Ram tana nun hlantu sipai pali - PC. Lalrinmawia RFN; Joseph Rothangpuia RFN; Jerusalem-thara RFN leh Biakrotluanga, Constable te hriatrengna lungphun chu a hawng bawk a. Govt. H/S Serchhip-a hun hman zawh a nih hnu hian Serchhip Chanmari Veng-a Chand kahna tlang-ah Vasudha Vandhan hun hman niin thingtiak 75 phun a ni bawk a. He hunah hian Rural Development Department-a thawktute leh Chanmari Veng VC te an tel a ni.

Comments

Popular News (Last 30 Days)

LPG man bithliah thar