Serchhip-ah Minister hovin Youth-20 Meet on Nationalism, Patriotism & Development neih a ni
Nimin-a he hun hmanna ah hian Minister Lalchhandama Ralte chuan nationalism leh development chu a kalkawp tlat tur a ni tih sawiin, “Ram leh hnam hmangaihna leh hmasawnna a kalkawp theihna tur chuan intodelh a tul a; taimak, tawrhchhel leh teirei peih a pawimawh a ni,” a ti. Tunlai thiamna leh changkanna hmangin Mizo thalaite pawh khawvel turkverh-ah englai pawhin kan dakchhuah thei reng tawh tih sawiin, “Hetihlai mek hian kan hnam thil te ngaisang a, chawisang tur leh kan hnam tawng te vawnghim turin tan kan lak a tul a; kan ram leh kan hnam hi kan changkan san a thiang lo,” a ti a. Mahni hnam changkansan duhna thinlung leh mahni tawng thiam loa changkanna chu changkanna mawng pawp a ni tih a sawi bawk. Minister chuan nationalism, patriotism leh development te chu inthlunzawm vek a nih avangin hnam thinlung pu tura kan inzirtir a ngaih thu leh thinlung dik kan pu tur a ni tih sawiin, Mizo thalaite zingah ram leh hnam mamawh ngaihtuah hoa, ram leh hnam hmangaihna leh ram hmasawnna ngaihtuah tlang thei tura hun tha buatsaih a ni chu lawmawm a tih thu a sawi bawk.
India ramin G-20 Presidency a chelh chhungin India ram hmun hrang hrangah Ministry of Youth Affairs & Sports, Govt. of India chuan Youth-20 Programme a buatsaih a. Mizoram-ah chuan Sports & Youth Services Department leh Mizo Zirlai Pawl (MZP) tangkawpin Mizorama District hrang hrangah Y-20 Meet on Nationalism, Patriotism & Development Programme an buatsaih a. Kumin July ni 14 khan Y20 Meet hi Chief Minister Zoramthanga hovin bultan a ni a, Aizawl bakah Champhai, Mamit, Kolasib, Saitual leh Khawzawl-ah te hlawhtling takin he Meet hi buatsaih a lo ni tawh bawk a ni.
Y20 Meet neih chhung hian ram leh hnam tana hmasawnna tur thil pawimawh tak tak inzirtir thin a ni a, zirlaite thinlunga ram leh hnam hmangaihna tuh turin Speaker thlanchhuah ten thu sawiin, Serchhip-ah hian MZP General Hqrs. a Adviser Lalhruaitluanga Chawngte chu Speaker a ni a. Mizo nationalism tobul, nihphung dik tak leh a awmzia te sawifiahin, chutiang thinlung pu turin zirlai kalkhawmte a fuih a ni.
Nimin-a he hun hman hi Govt. Serchhip College Principal C. Laldintluanga chuan kaihruaiin MZP General Hqrs. President Lalnunmawia Pautu chuan keynote address a sawi thung a, Serchhip khawpui chhunga School leh College zirlai te an tel a ni.
Comments
Post a Comment