Saitual-ah DCSO Office thar Minister in a hawng

Food, Civil Supplies & Consumer Affairs changtu Minister K. Lalrinliana chuan nimin khan District Civil Supplies Office (DCSO) Office thar a hawng.

Saitual DC Complex sak thar mek bula Legal Metrology Working Laboratory Building sak chu Saitual DCSO Office atan hian siam a ni a, DCSO Office thar hawnna puala inkhawm neih ah Supply Minister chuan DCSO Office hawn thar chu Department leh Saitual District tan hmasawnna rahbi thar anih ngei a beisei thu sawiin, mipuite ten nasa taka an chhawr tangkai ngei a rin thu a sawi a. Ration card tihdanglam ngai a tam thin thu leh hengte hi Aizawl-ah emaw, Champhai-ah emaw tih a ngai tawh lovin Saitual-ah ngei a tih theih dawn tih sawiin, lawmawm a tih thu a sawi bawk a ni.

Saitual-a District Civil Supplies Office tharah hian District Civil Supplies Officer (DCSO), Inspector, Sub-Inspector leh Group D pahnih dah an ni a. DCSO thar hian Saitual District hnuaia Supply Kudam 10 a enkawl dawn a. Tun hmain heng kudam te hi DCSO Aizawl East leh DCSO Champhai ten an hmui thin a ni. Supply Minister in a enkawl Department dang Fisheries Department hnuaiah District Fisheries Development Office Saitual District pawh hawn a lo ni tawh a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man