MRB Chairman thar in Mizoram Larsap a kawm

Mizoram Rural Bank Chairman thar Sheryl L. Vanchhong chuan nimin khan Governor Dr. Hari Babu Kambhampati chu Raj Bhavan-ah kawmin Mizoram mipui ten awlsam leh tangkai zawka Bank an hman theih dan tur leh Bank Branch la awmlohna hmuna Banking Service pek theih dan turte an sawi dun.

MRB Chairman thar hnenah hian Governor chuan Mizoram Rural Bank chu Mizoram chhunga Bank inzar pharh zau ber anih avangin kawng hrang hranga midangte tana awlsamna thlen thin tu anih thu a sawi a. Nitin a eichawp zawng te leh khawsak harsa zawkte dinhmun khaichhuah a nih theihna tura Sawrkar laipuiin ruahmanna a siamte nasa zawka tihhlawhtlin a pawimawh thu leh chungte chu Sawrkar Department hrang hrangte leh Bank tangkawpin ti hlawhtling thei se a duh thu a sawi a. MRB chu ram hmasawnna thlentu leh chumi atana thawktu pawimawh tak ni zel turin duhsakna a hlan nghal a ni.

MRB Chairman pawhin an hmalak mekna leh an thlen chinte Larsap hi hrilhin, Sawrkar laipuiin a ngaih pawimawh em em PMJDY Account chu Branch zawng zawngin an hawnsak theih thu te, khawl hmang uar tura inzirtirna (digitization initiative) ah pawh a thawhhlawk ber Bank an nih thu te, mipuite mamawh phuhru zel tura an Bank an inhawn thu te a tarlang bawk. Larsap in rawtna a lo siamte pawh a remchan ang zela tihhlawhtlin an tum tur thu a sawi bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar