Ruihhlo man a tlawm avangin ruihhlo ti thar leh a sim tawh zingah ti thar leh an tam
.jpeg)
Serchhip DC Meeting Hall-a thutkhawm neih ah hian District Bawrhsap David Lalthantluanga chuan India ram chuan kumin May thla khan China lehpelin khawvel-a mihring tam berna ram dinhmun a luah ta tih sawiin, chutihrual chuan TB leh HIV vei erawh an la tam em em tih a sawi a. Hei vang hian heng natna te dolet hna theihtawp chhuaha kan thawh tlan a ngaih thu leh heng natna tipung thei te tihrem a nih theihna turin VC leh YMA bakah sawrkar lama thawktu Police leh Excise & Narcotics Department ten theihtawp an chhuah tlan a tul thu a sawi bawk.
He hunah hian Serchhip District TB Officer leh District AIDS Control Officer Dr. Lalnunnhlima Khiangte chuan Serchhip District-a TB leh AIDS dinhmun leh an hmalakna te tarlangin, Health Department-a Joint Director IEC Division (MSACS) Lalzuiliani Hrahsel chuan Integrated Health Campaign (IHC) leh Quiz Competition chungchanga hmalakna turte a tarlang bawk a. He huna tarlan a nih danin nikum (2020)-ah khan Serchhip District-ah mi 1735 enfiah atangin TB hrik pai mi 58 hmuh niin kum hmasa lama lo hmuhchhuah tawh nen mi 68 enkawl dam an ni a, TB hrik pai mi 5 an thi thung a. Kumin (2023)-ah mi 531 enfiah tawh atangin TB hrik pai 39 hmuh niin mi 8 enkawl dam an ni tawh a, TB hrik pai mi pahnih an boral tawh bawk a. Kum 2022-2023 chhungin Serchhip District-ah Raipuar mi 875 enfiah atangin HIV hrik kai mi 7 hmuh niin mi nawlpui enfiah 2159 atangin HIV hrik kai mi 68 hmuh an ni bawk a. Hemi hun chhung hian District puma mi 3034 enfiah atangin HIV hrik kai mi 75 hmuh an ni.
Tunhnaiah HIV hrik kai an pun thu leh damdawi (Heroin) man a hniam avangin ti thar an tam bakah a sim tawh zingah pawh ti thar leh an tam thu he hunah hian tarlan a ni a, Hepatitis C kai pawh an tam thu leh heng mite hian inchiuna hriau inhmantawm lo mah se an inchiuna tur damdawi hmun khat-a siam/chawh an inhip tawm avangin hemi atang hian Hepatitis C inkai-chhawng hi an pung nia a lan thu tarlan a ni a. Tun dinhmunah Serchhip District-ah damdawi-a inchiu thin hi mi 579 an awm nia chhinchhiah a nih thu leh ruihhlo ti tamna zingah chhiar tel kan nih thu tarlan a ni bawk.
District TB Officer chuan Ministry of Health and Family Welfare, Govt. of India in ‘End TB 2025’ hnuaia hma an lakna pakhat atan TB hrik pai ten chawtha an hmuh theihna tura sum leh pai thawhkhawmna, Community Support for TB Patient chu kalpui mek a nih thu sawiin, Thla tin Rs. 700/- zelin a tlem berah thla ruk (6) chhung sum hi thawh theih a nih thu leh hetianga sum thawh hi Serchhip District-ah an tlem avanga tanlak a ngaih thu a tarlang a. TB vei awmlohna khua ‘TB Mukt Village Council’ siam tura hmalakna pawh kalpui a nih dawn thu sawiin, hetah hian mi 1000 zelah mi 30 te enfiahin TB awmlohna khua te chu lawmman siam sak an nih dawn thu a sawi a. District puma HIV/AIDS leh TB kai a nawlpuia zawnchhuahna tura bultanna chu tun thla ni 21 khian neih nise an ti bawk.
Meeting hian HIV dona kawngah Village Level, District Level, State Level leh Regional (NE) Level Quiz Competition chu a tahtawla neih relin, a remchan angin Cable TV rintlak te nen thawhho tum nise an ti a, zirna In leh Kohhran Sunday School-ah te pawh beihpui thlak an rel bawk a ni.
He thutkhawm ah hian Serchhip DC bakah Serchhip CMO Dr. LP. Malsawma, SDO (Sadar) Rebecca Laldinmawii Hrahsel leh District AIDS Prevention & Control Committee/TB Forum Member te an tel a ni.
Comments
Post a Comment