NH. 54-ah leimin vangin lirthei an tangkhang

Serchhip leh Keitum inkar-a National Highway-54 chu nimin khan leimin in hnawhin nimin tlai khan lirthei kal theiha thenfai a ni a, ruah a sur chuan lei hi min leh mai thei dinhmun ah a ding a ni.
Serchhip leh Keitum inkar NH. 54 hi nimin zing khan Serchhip Sailiamkawn atanga km 2 vela hla ah kawngchhak atanga leimin in hnawh vekin lirthei eng chi mah kaltlang theih lohin a awm a, hei vang hian lirthei engemaw zat chu helai hmunah hian kaltlang thei lovin an tang a, kawng siam hna thawktu Company te chuan kawng then hna hi nimin atang khan thawk nghalin chhimlam leh hmarlam atanga a thenfai hna hi thawh a nih hnuah nimin tlai dar 5:00 pelh hnu hret khan lir-thei kaltlang theiha thenfai a ni.

Helai hmuna leimin hi kawng laihna lai a nih avang leh ruah a sur zui zel a nih chuan lei hi min leh mai thei a nih avangin kawng dinhmun hi ala chiang lo hle a. Serchhip Sailiamkawn atanga Lengte ram kaltlanga Dawngzawl-a chhuak kawng chu lirthei thenkhat ten zawh mah se he kawng hi a tet bakah a chhiat bawk si avangin lirthei tan kal a harsa hle nia thudawn a ni bawk.