Ruihhlo dona ah tha thlah theih a ni lo - Minister, SW&TA

Social Welfare & Tribal Affairs Minister Er. Lalrinawma chuan Ruihhlo do hna chu, do hneh har tak angin lang mahse tha thlah theih a nih loh thu a sawi.

Aizawl District Level Task Force on Ruihhlo Do in Ruihhlo do tura infuihtharna leh intuaitharna ni atana Ruihhlo Do Ni programme nimin-a Aizawl Vanapa Hall-a an buatsaih ah Er. Lalrinawma chuan Ruihhlo do hna chu tha kan thlah rualin tuna kan harsatna tawh aia nasa zawkin min tuam nghal dawn tih hriain, theihtawp kan chhuah a, kan tanrual a pawimawh takzet tih a sawi a. Thangthar te ruihhlo bawihah an tan loh nan chhungkua atanga bultan a pawimawh thu sawiin, nun zahawmna vawnhim te, mahni inthununna leh harsatnate chu chonaah lak a hneh tumna te chu mahni nun a vawn tlat a pawimawh thu a sawi bawk.

SW&TA Minister chuan ruihhlo do hna chu mi tu te emaw bik tih tur chauh nilovin, kan zavai hian tih theih leh tih tur kan nei tih hriat thar leh kan ngaih pawimawh a ngai tih a sawi a. A hmatawng a awmte phei chu an hah hle tih sawiin, heng zawng zawngah hian tangrual sauh sauha hma lain, tihnualtu nilova a tiphurtu nih tuma tawngkam te ulukin, theihtawp chhuah tlan a pawimawh thu a sawi bawk a ni.

Nimin-a he hun hmanna ah hian District Level Task Force on Ruihhlo Do Ex-Chairman Dr. Lalhriatzuali Ralte chuan sawrkarin ruihhlo do kawnga a hmalakna te leh ruihhlo do a tul zia sawiin, Central YMA President R. Lalngheta pawhin Mizote hi hnam huaisen inti mah ila ruihhlo in min sah chah chuan hnam ral tur dinhmunah kan ding thei a ni tiin, ruihhlo do hlawhtling tur chuan midang rin emaw, inlak ralban mai chi a nih loh thu leh, mi tin mawhphurhna a ni tih hriat tlan a tul thu a sawi bawk a ni.