Mizoram a Rail Line thar Survey pawm a nih vangin Governor in sawrkar chungah lawmthu a sawi

Mizoram Governor Dr. Hari Babu Kambhampati chuan Mizoram-a Railway line thar kalna tur zawnchhuah pawm a nih a vangin Prime Minister leh a kaihhruai Central sawrkar hnenah lawmthu a sawi.

Mizoram Governor hian nimin khan Twitter kaltlangin lawmthu sawina hi tarlangin, KM 223-a thui Sairang leh Mizoram chhim lama Myanmar ramri Hmawngbuchhuah thleng tura Rel kawng atana Final Location Survey (FLS) neih tak chu Mizoram hmasawnna atana thutlukna pawimawh tak a nih avangin Mizoram mipui aiawhin lawmthu a sawi tih a tarlang a ni. He Survey in a tarlan dan chuan Sairang leh Myanmar ramri dep, Mizoram chimlam hmawr tawp a Hmawng-buchhuah chu Rel kawng in a thlunzawm a ni dawn a, Hemi chungchangah hian Northeast Frontier Railway-a DGM Office chuan thuchhuah siamin, Act East Policy kalpui mek angin Indian Railways chuan Mizoram chhunga Myanmar ramri chu Rel hmanga thlunzawm a tum a. Tunhnai khan Railway Board chuan Myanmar ramri bul, Mizoram chhunga KM 223, Sairang (Aizawl) atanga Hmawngbuchhuah thlenga Final Location Survey (FLS) neih tak chu a pawm a ni.

Mizoram awmna hi India tana hmun pawimawh tak, Strategic Importance a nih avang leh sumdawnna huang zauhna atana hmun remchang a nih dan zawng zawngte ngaihtuahin Ministry of Railways chuan he Project hi lak a rel a. He Project hian Hmawngbuchhuah kaltlangin India hmarchhak lam kalpawhna kawngpui pawimawh tak a hawng dawn a ni. Myanmar-a Sittwe Port kaltlanga hmarchhak thlenga bungraw phurh man leh bungraw phurh hunchhung chu nasa takin a tihtawi rin niin tunhnai khan Myanmar-a Sittwe Port hi Union Minister of Ports, Shipping and Waterways Shri Sarbananda Sonowal chuan a hawng tawh a ni.

Tunah hian NF Railway chuan Bairabi leh Sairang inkarah KM 51.38-a thui Broad-gauge Railway Line Project a kalpui mek a, hei hi zawhfel thuai tum a mi a, Broad-gauge line thar ruahman hian, India leh Myanmar leh Asia khawmualpui a ram dang te nena in sumdawnna a siam dawn bakah, inzawmna a ti nghet dawn a ni. Hmarchhak state-te sum leh pai lama hmasawnna tihpunna kawngah pawh he project hian nasa takin awmzia a nei tura beisei a ni.