Revenue Minister in an hmalakna a puangzar

Surveyor te pawisa pek mipuite bat a nilo - Revenue Minister

Land Revenue & Settlement Minister Lalruatkima'n Assam Rifles te awmna hmuna LSC nei sawrkarin Show Cause Notice a pek te zingah Court a kal an awm tih sawiin, inthlan hma in cancel sak vek an nih a beisei tih a sawi a. Revenue Department-a Surveyor te pawisa pek chu mipuite bat a nilo tih a sawi bawk.

Nimin khan Aizawl Press Club-ah Land Revenue & Settlement Minister Lalruatkima hian thuthar thehdarhtute kawmin Revenue Department hnuaia sawrkar hmalakna hrang hrangte a tarlang a. Revenue Minister chuan Aizawl Assam Rifles rama LSC nei zingah Show Cause Notice an pek dawnin an Address zawn hmuh loh 8 lai an awm tih sawiin, an insawifiah theih nan chanchinbu kaltlangin hriattirna chhuah a nih thu leh mi 2/3 Court-ah an kal thu a sawi a, inthlan hma in cancel sak hman an beisei tih sawiin, mi tam takin vantlang tana thil tha tiin LSC surrender an awm thu a sawi a ni.

Revenue Minister chuan a Department-a Surveyor te pawisa pek chu mipuite bat a nilo tih sawiin, pawisa in pek a awm thin nia sawi chu pawi a tih thu leh hlawh pangngai nei an nih avangin mipuite pawisa pe tawhlo turin a ngen tih a sawi a, mi thenkhatin Surveyor te Office-a lam kher an ngaih thin chhan chu ram tehna tur hmun hriat a harsat thin avangin a ram neituten an lam a awlsam zawk nia an hriat vang leh tunlai thiamna hmanrua te nen thawhchhuah ngai te an nih avangin ram neitu ten an hruai/lam erawh a ngai ve thin tih a sawi a. Surveyor indaihlohna a nasa hle tih pawh sawiin, tun dinhmunah Surveyor 15 lakna tur peihfel a nih tawh thu leh MSSSB in a lak lam an buaipui tur thu a sawi bawk a. Kum 2018 Manifesto-a Land Reforms siam that rawtna an ti hlawhtling tih sawiin, Revenue Department chu mipui ngheng anih avangin nasa takin mipui tan hna an thawk tih a sawi a, Ramri buai chungchangah harsatna tawk thin mahse Nationalism keng kawhtu MNF party te chu mipui tana rintlak an nih zia an tilang a, ramri chungchangah pawh hma an sawn zel tih a sawi bawk.

Minister chuan Land Revenue & Settlement hmalakna hrang hrang tarlangin, kum 2018 atangin House pass 4504 pe tawhin, Shop Pass 19 leh Periodic Patta 853 an pek bakah Land Lease 935 pekchhuah zingah 415 chu Departmental Land Lease niin a dang 520 chu pawl leh mimal hnena pek a ni a, Cadastral LSC 13,221 pekchhuah anih bakah House pass atanga LSC a siam chu 14,542 a ni a, Periodic Patta atanga Garden LSC-ah 266 leh a ni tih a sawi bawk a. Mimal in an ram pass huamchhung bak an lo enkawl vang emaw, pass lo inpekthuah emaw, thildang avang emaw a ram chungchanga intihbuai a awm thin thu leh heng thubuai zinga 1504 chu chinfel a ni tih a sawi bawk.

Development project emaw, Project dang emaw atana Forest Reserved Areas te tihchhiat a nihin Compensatory Afforestation tur atan ram pek thin a nih thu pawh Minister chuan sawiin, CA Land hi Project 7 atan pekchhuah a ni tih a sawi a, SVAMITVA Scheme hnuaiah kum 2020 atangin thingtlang khaw lam te Property Card pek mek zel a nih thu leh Phulpui leh Tachhip-ah pekchhuah tawh niin 420 pekchhuah a nih thu sawiin, hmarchhak State te zinga Property Card pechhuak thei hmasa ber an ni tih a sawi bawk.

Kum 2018-2019 atanga 2023-2024 thlenga Chhiah an hmuh dan pawh Minister chuan tarlangin, hemi hun chhung hian Chhiah chi hrang hrang Rs. 1,03,75,21,788 an hmuh thu a sawi a. Heng te hi Registration Fee-ah Rs. 24,74,03,864/-; Stamp Duty-ah Rs. 6,58,49,905/-; Land Revenue Tax-ah Rs. 61,36,87,289 leh Non-Tax Revenue-ah Rs. 11,05,80,730/- te a ni tih a sawi a. Omline-a Tax pek theihna tur buaipui mek a nih thu a sawi bawk.