NH. 54 laih ah zangnadawmna la dawng lo 93 awmin Vawiin atangin In la thiat lo te enfiah an ni dawn
Serchhip DC Office atanga thu kan dawn danin NH. 54 laihzauh leh siamthat hna thawh mekah hian Serchhip District a paltlang tur chinah mi 2079 te chu Dan anga an ram lak sak an ni dawn a, heng mite hi a theih ang anga buaipui an nih hnuah a tam zawk te chuan zangnadawmna an lak tur ang la fel tawhin tun thlenga zangnadawmna la dawng thei lo mi 93 an awm mek a, heng te hi a tlangpuiin ram lak dawn lai vela a ram neitute khaw danga an awm avanga an ngaihven loh leh Huan/Ram pass thehluh tlai te a ni tlangpui tih an sawi a ni.
Hetihlai hian Serchhip Addl. DC James Lalnithanga chuan July 28, 2023 khan lehkha tichhuakin National Highway-54 zauhna atana ram lak sak te chu an ram lak chin chhuahsan tur leh In te thiat tura tihna thupek tichhuak tawhin, thupek chhuah atanga kar hnih (2) chhungin an In te thiat tura hriattir an lo ni tawh tih a tarlang a. National Highway-54 zauh hna thawh mekah Compensation/Rehabilitation and Resettlement dawng tawh zinga tel chunga an chenna In tun thlenga la thiat lo te avangin hmasawnna hna thawh mek a thuanawp thu pawh tarlangin, Section 3B (2) of The National Highways Act, 1956 in thuneihna a pek angin heng mahni ram la chhuahsan lo leh In la thiat lo te hi Competent Authority for Land Acquisition (CALA) chuan Magistrate leh Police-te nen a hmuna kalin an tlawh chhuak dawn tih a tarlang a. Ruahman lawk ang chuan Vawiin hian Serchhip, Keitum leh Bungtlang te tlawhin naktuk-ah Khumtung, Baktawng, Buhkangkawn leh Chhingchhip te tlawh leh a ni anga, tun thla ni 8 khian Chhiahtlang huamchhung chin enfiah leh a ni ang.
Serchhip DC Office-a thawktute chuan Vawiin atanga In leh bungrua la senghawi lo te enfiahna ah hian Addl. DC leh SDC bakah NHIDCL, Police leh a bialtu VC te an tel dawn thu sawiin, Serchhip bikah by-pass siam a nih avangin In chhe tur a tam loh thu leh In la thiah loh hi pakhat chauh a awm nia an hriat thu an sawi a, Keitum-ah 15 vel awmin Bungtlang-ah 11 vel a awm thu an sawi a. Naktuk lama an enfiah leh tur Chhingchhip Venghlun-ah hetianga In la thiat lo hi 45 vel lai an awm thu leh Mualpui lamah erawh pakhat vel chauh a awm thu sawiin, Baktawng-ah 4 leh Khumtung-ah pakhat an awm thu an sawi a. Chhiahtlang bik erawh report ala luh fel loh avangin a zat chiah hriat theih ala ni lo tih an sawi bawk.
Thudawn danin Vawiin a Addl. DC hova enfiah turah hian zangnadawmna la tawh si, tun thlenga mahni In la thiat lo te leh bungrua la seng-hawi lo te chu ngaih pawimawh a ni dawn a, zang-nadawmna la zingah hian mahni thu-a In lo sa leh te pawh awmin heng te pawh hi Vawiin hian an enfiah nghal dawn bawk a ni.
Serchhip DC Office-a thawktute chuan zangnadawmna la fel tawh te hi an ram chhuahsan tur leh an In te thiat tur hian August 29, 2019 khan hriattirna tihchhuah a lo ni tawh tih sawiin, hemi hnu February 24, 2020 leh April 15, 2020 pawh khan tichhuak lehin kumin February 4 khan CALA chuan thupek a lo tihchhuah nawn leh tawh thu an sawi bawk a ni.
Serchhip by-pass Road laih meka ram neitu ten zangnadawmna an la lak loh avanga helai kawng an dan chu nimin thleng khan an la dang zui zel nia thudawn a ni a, hemi chung-chang ah hian DC Office-a thawktute chuan zangnadawmna hi pek an nih awm an la hriat loh thu leh hnathawktute pawh an la chawl nia an hriat thu an sawi a, NHIDCL hmalakna an ngaihchan thu an sawi a ni.
Comments
Post a Comment