RD Minister in sawrkar laipui a dawr chhunzawm

Rural Development Department changtu Minister Lalruatkima chuan niminpiah khan Ministry of Rural Development hotute kawmin Mizoram thil pawimawh hrang hrang a sawipui.

RD Minister hian RD Secretary Shailesh Kumar Singh chu a Pisa-ah hmuin RD Secretary hian ni 100 inhlawhna chu tun Financial Year atan Mizoram tan an sanction tur thu a lo hrilh a, Ni 100 inhlawhna kalpui kawngah Mizoram in hna a thawh that em avangin duhsak bik pawh a inthlahrunawm loh thu leh State dangte pawhin Mizoram hi hemi kawngah hian entawn vek se a duh thu Minister Lalruatkima hi a lo hrilh bawk. Union RD Secretary hian RD hnuaia Cluster Facilitation Project (CFP) kaltlanga Ministry lamin Mizoram tana pawisa an la pekchhuah loh awm ang angte pawh karleh lamah chuan rawn release hman an tum thu Minister hi a hrilh bawk a ni.

Rural Livelihood Mission hnuaia Scheme pakhat 'Ajeevika Grameen Express Yojana' (AGEY), thingtlang lama Self Help Group ten eizawnna atana an hman tur lirthei pekchhuah chungchang pawh Mizoram tan an release thuai tur thu a hrilh a. Hemi atan hian Ministry lama a khawihtute pawh Secretary hian Minister nena an inkawm lai hian sanction pawh buaipui nghal turin thu a pe nghal bawk a ni.

Union Rural Development Ministry Secretary hian Mizoram rawn kal a chak thu Minister hi a hrilh a, inthlan hma ngeia rawn tlawh a tum thu a sawi bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man