PWID te zinga Hepatitis C umbo nana hmalakna tur District pahnih tan Health Minister in a hawng

Aizawl leh Champhai District-a kalpui tur Project, ‘Uniting for a Hepatitis-C Free Mizoram’ tih chu nimin khan Health Minister Dr. R. Lalthangliana chuan a hawng.

Drugs inchiu thin, People Who Inject Drugs (PWIDs) te zinga Hepatitis C (HCV) dinhmun hriatna leh a veite enkawlna tur project, Mizoram-a HCV hmuhchhuah tamna District pahnih, Aizawl leh Champhai a tan tur Project, ‘Uniting for a Hepatitis-C Free Mizoram’ hawnna hun DHME Auditorium-a neih ah hian Dr. R. Lalthangliana chuan Hepatitis chi hrang hrang zingah Hepatitis C chu Mizoram-a hmuhchhuah tam bik a nih thu sawiin, Hepatitis C bik hi a hri danna vaccine a awm lova, a inenkawlna man a sang tih a sawi a, “Anni tanpuina in MSACS leh NHM ten thawk dunin Hepatitis umbo nan ruahmanna an siam hi theihtawp kan chhuahpui dawn a ni,” a ti.

He Project hnuaiah hian Aizawl leh Champhai District a inchiu thin, PWIDs te chu an HCV dinhmun test vek an ni dawn a, test a positive te tan a nemghehna test, Confirmatory Test an tih sak leh anga, chumi atanga HCV vei hmuhchhuahte chu enkawlna pek an ni dawn a ni. He project bultumtu hi khawvel huapa natna hri hmuhchhuahna (diagnostics) lamah thawktu pawl FIND leh damdawi company Roche te an ni a, anni hian MSACS leh NHM hnuaia National Viral Hepatitis Control Programme te an thawhpui dawn a. He project hi nakum August thla thleng kalpui tum a ni.