GST Council Meeting-ah Mizoram atangin Taxation Minister leh Department hotute an tel

GST Council Meeting vawi 51-na chu niminpiah khan Video Conference hmanga neih niin Mizoram atangin Taxation Minister Lalchamliana leh thawktu dangte an tel a ni.

GST Council Meeting hi Chairperson Nirmala Sitharaman, Union Minister for Finance & Corporate Affairs chuan kaihruaiin kum thum chhung lai an lo ngaihtuah tawh, pawisa khelhna hmun (Casino) atangte, Sakawr intlansiak atanga pawisa inchawina (betting on horse racing) atangte leh online gaming atangte a GST lak dan tur an sawiho a. Heng pawisa khelhna hrang hrang atangte hian GST 28% lak remtih a ni a. Hemi atan hian tuna GST Dan hman mek chu tihdanglam (amend) a ngaih dawn avangin October ni 1, 2023 a hman theih turin Central leh State hrang hrangte chu hma la nghal tura beisei an ni.

Mizoram sawrkar Taxation Department chuan July thla khan Chhiah cheng vbc. 108.75 a lakhawm a. Hetah hian GST ah vbc. 79.34, VAT-ah vbc. 27.79 leh Profession Tax-ah vbc. 1.61 a tlingkhawm a ni. Sawrkar kum kal mek 2023-24 chhung hian July thla thleng khan Chhiah Chi hrang hrang cheng vbc. 415.84 an lakhawm tawh a ni.