Politics khelh dan thianghlim lantir kan tum - Sapdanga

ZPM Working President K. Sapdanga chuan ZPM chuan a thlawna sum sem an do tlat tih sawiin, “Mizoram-ah politics khelh dan thianghlim lantir kan tum,” a ti.

ZPM in nimin-a Chhung Inkhawm Aizawl-a an Office-a an neih ah ZPM Working President chuan an khingpui Party ten ‘Kalphung Thar pawh an hrilhfiah thiam lo’ an ti thin tih sawiin, “Kum 1972-a UT kan nih atangin Mizoram in Ministry chhawng 11 kan nei tawh. State kan nih hnuah Ministry chhawng 8-na kan hrawn mek. Khatih chhung zawnga sawrkar ding tawhten an lo neih ngai loh, an lo tih ngai loh kha keini ZPM party hian Danpui-ah Kalphung Thar lian pui pui chi li kan dah,” a ti. ZPM Working President chuan ‘Kut hnathawktute tan Kalphung Thar’ hnuaiah ZPM sawrkar a din chuan, Budget Session hmasa berah kut hnathawktute khaichhuahna turin thlai thar leina tur sum Budget-ah dah a ni ang tih sawiin, “A bultanna atan thlai chi li-ah enchhin a ni ang. A thar huna a rate tur bithliah sa a ni dawn a, Mizo kut hna thawktute hi eng anga taima nge kan nih khawvel hriattir kan tum. Hetih rual hian, thlai dang chingtute pawh an hah thlawn loh dan tur ruahman hmaih a ni lo ang,” a ti.

Thalai lehkha an thiam emaw, thiam lo emaw, mahni ke-a dinga nupui fanau chawmna tur thawhchhuah nei tura ruahmanpui chu sawrkar hna hmasa tur a ni tih ZPM Working President chuan sawiin, “Thalai mahni ke-a din chak ngawih ngawihte bana kaih policy hi Mizoram-ah kan la hre ngai lo a, thil thar Kalphung Thar zingah pawh ram hmasawnna atan tangkai pawl tak tur a ni,” a ti a. Kut themthiamte tan paradise siam an tum thu pawh ZPM Working President chuan sawiin, “ZPM hi sawrkara mawhphurtu a hlankai a nih phawt chuan, sawrkar building leh sawrkar luah building reng rengah Mizopa siam furniture te, Mizonu tah Parda te hman kan tum tih kan puang tawh. He thil ti tur hian harsatna chhete mah a awm lo. Mizoram tihhmasawnna tur sum tam tak State pawna luangchhuak hum hum kha ramchhung Mistiri te leh puantahtute kutah a lut tawh dawn tih mai a ni. ZPM sawrkar a din phawt chuan, dingchhuak hmasa pawl tur chu kan awm ang,” a ti.

Heng bakah hian Contract hna chu contractor kutah dah a nih dawn thu pawh ZPM Working President chuan sawiin, tunhma lawkah chuan kawng laih tur emaw, In sak tur emaw a awmin, sawrkarin Tender chhuahin Registered Contractor ten an chhang thin tih a sawi a, tunah erawh chuan a hmutu tur thlansa vekin, Ruling Party Worker te kutah a lut fai ta vek niin a sawi a. “Pathian leh mipuite zarah ZPM hian thuneihna a chan ve mial chuan, Contract hna chu Contractor kutah a kir leh anga, sawrkar Engineer ten an endik leh anga, hlemhletna awm lo turin thuneituten fir takin an veng ang,” a ti bawk.