Myanmar raltlante chanchin leh an biometric data chhinchhiahna Vawiin atangin kalpui dawn

Mizoram sawrkar chuan Vawiin atang hian Myanmar atanga raltlante chanchin kimchang leh an Biometric Data chipchiar taka chhinchhiahna a kalpui dawn.

Ministry of Home Affairs in thupek a siam angin Mizoram leh Manipur State-ah te Myanmar atanga raltlan lo lut te chu an chanchin kimchang taka lakhawm a, an lokalna te leh an kut zia, an Mit note thlalak te leh an nihna kimchang taka lakkhawm tur a ni a, Mizoram Home Department-a Joint Secretary-cum OSD David H. Lalthangliana chuan Sawrkar laipuiin Myanmar raltlan te atanga an chanchin lakkhawm dan tur a buatsaih chu tihdanglam a ngaih avangin kalpui lawk theih a ni lo tih sawiin, District tinah DC te kaihhruaina in kalpui tur a ni tih a sawi a ni. Hnahthial District thuneitute chuan a hmaa Aizawl-a Master Training nei lo Hnahthial District lama thawktute chu Thawhlehni khan Online-a Data lakkhawm dan zirtirna pek an nih thu leh Offline-a chanchin kimchang leh biometric data lakkhawm dan tur zirtirna pek an nih thu an sawi bawk a ni.

Hemi chungchangah hian Joint Secretary (Foreigners), MHA Anil Malik hoa sawiho niin a Format chu Myanmar raltlante chanchin lakkhawm dan tura mila siam danglam turin an ti a, Joint Secretary (Foreigners) ho hian DC leh SP te nen training neih ani tawh bawk a ni. David H. Lalthangliana chuan National Crime Records Bureau (NCRB) leh National Informatics Centre (NIC) rawtna te chu pawmpuina nghah anih avangin duh anga chakin kalpui theih a nilo tih a sawi a, Technical lama harsatna a awm avangin September thla tawp, huntiam chhunga zawh chu a harsat a rin thu a sawi bawk.

Home Department hotute sawi danin Myanmar raltlan Mizorama awm zawng zawngte chu Temporary Identity Card pek vek an ni tawh a, tun dinhmunah Myanmar atanga raltlan 35000 vel Mizorma-ah an awm nia chhutin Myanmar atanga raltlante chu dan loa pem lut an nih loh thu an sawi a, “An tualchhung buaina avanga sahimna zawnga lo lut an ni,” tiin Zohnahthlak unaute an ni tih an sawi bawk.