Agriculture Minister in Lakhuihthei vailiam

Tuichangral Organic FPC te tharchhuar Lakhuihthei Quintal 5 (kg. 500) chu Josie’s Kitchen, North East Cuisines, Mumbai-a hralh turin nimin zing khan Agriculture Department changtu Minister C. Lalrinsanga chuan Millenium Centre, Courtyard atangin a vailiam.

Lakhuihthei vailiam te hi Central Sector Scheme (CSS), MOVCD-NER hnuaia Farmer Producer Company (FPC), Tuichangral Organic Farmer Producer Company Ltd., Khawzawl District te tharchhuah a ni tih Minister chuan sawiin, “Anni hi MOVCD-NER Phase-III hnuaia FPC inziaklut niin, member 500 an ni. An FPC hian Lakhuihthei hi thlai thlan bika neiin nikum chhung khan Metric ton 30 dawn an tharchhuak a. An FPC hian Khawzawl District chhunga Lakhuihthei ching khaw hrang hrang pariat – Tlangpui, Tlangmawi, Lungtan, Sialhawk, Khawhai, Chalrang, New Chalrang leh Vangtlang te a huam a ni,” a ti. Tun tumah hian market zawnna atan Mumbai-ah Lakhuihthei sample quintal 5 thawn a nih dawn thu pawh sawiin Minister chuan, “Beisei anga a kal anih chuan market nghet kan hmuh theih phah ngei kan ring bawk a ni,” a ti a. Khawzawl tlangdung lam lakhuihthei hi a tlangpuiin ‘Giant Kew’ variety niin, “An thlum tui em em bakah tun tuma kan vailiam tur phei hi chu ‘organic’ lakhuithei ngat an nihna hian an hlutna a belhchhah hle a ni,” a ti bawk.

State Lead Agency – Mission Organic Mizoram leh MOVCD – NER Scheme hnuaia Service Provider ni lai, Clover Organic Pvt. Ltd te tangkawp hmalakna in nikum September thla khan Sonipat, Haryana lamah Tuichangral FPC tharchhuah Lakhuihthei metric tonne 18 vailiam ni tawhin nikum August thla khan Milennium Centre kawtzawlah vek hian lakhuihthei zawrhchhuah runpui hlawhtling taka buatsaih a lo ni tawh bawk a, Tuichangral FPC te hian nikum September thla vek khan Ministry of Agriculture and Farmer’s Welfare atangin FPC thawk tha award an lo dawng tawh a. State Lead Agency – MOM leh Service Provider – Clover Organic Pvt. Ltd te kaihhruaina hnuaiah Tuichangral FPC hian nasa taka hma lain kumin April ni 28 khan Konkuwan Herbs Pvt. Ltd. te nen in sumdawn tawnnana tur (contract farming) agreement an lo sign tawh bawk a. He an inremsiamna kaltlang hian ‘Anchiri’ (Sugandhmantri) market tha tak sawh ngheh tum a ni bawk.

Tuichangral Organic Farmer Producer Company Ltd. te hian an FPC hmasawn zel nan Food Processing lam an bawhzui chho mek bawk a. Tun dinhmunah hian an FPC kutchhuak – Lakhuihthei tui, Lakhuihthei Jam leh Lakhuihthei Squash te buaipui chhoh mek niin, reilote a zawrh chhuah theih tura hma lak mek a ni bawk a, an product zawng zawng hi ‘organic’ a ni vek bawk a ni.