Assembly inthlanpui-a hman tur Electoral Roll enfiah chungchang BLO te zirtir an ni

Mizoram in kumin a Assembly inthlanpui a hmachhawn tur atana inbuatsaihna atan Electoral Roll enfiah hna chu Vawiin hian thawh tan a ni dawn a, hemi atan hian Serchhip District chhunga Booth Level Officer (BLO) te tan nimin khan Serchhip-ah Training buatsaih a ni.
Serchhip DC Conference Hall-a BLO te tana Training hi Serchhip SDO (Sadar) Rebecca Laldinmawii Hrahsel chuan hmanpuiin Booth Level Officer (BLO) te chu inthlanna felfai leh thianghlim kan neih theihna tura a pawimawh hmasa an ni tih sawiin, Electoral Roll-a hming chuang tur dik tak te an hming a chuan theihna tura thawktu pawimawh an ni tih a sawi a. Kumin hi Mizoram Assembly inthlanpui kum a nih avangin Electoral Roll felfai neih a pawimawh lehzual tih sawiin, BLO te chu anmahni Bial hrechiangtu an nih avangin hming thun thar ngai leh paih turte uluk taka lo ngaihven turin a chah bawk.


He Training hi Serchhip Election Officer Lalrinsanga Hnamte chuan kaihruaiin Vawiin atanga Electoral Roll Special Summary Revision neih tur hi kumin-ah a vawi hnihna a nih thu leh inthlanpui neih dawnah Election Commission of India in ruahmanna a siam angin Special Summary Revision hi neih thin a nih thu a sawi a. Kumin a Assembly inthlanpui neih tur atan hian kum 2018 milin inbuatsaihna kalpui a nih thu pawh sawiin, kum 2018-ah khan October 6-ah Assembly inthlanpui neih hun tur puan a nih thu leh tuna Electoral Roll Revision neih turah hian October 4-ah Final Electoral Roll tarchhuah tur a nih avangin Electoral Roll ennawn hna thawh zawh a nih chuan inthlanpui neih hun pawh puan a nih mai a rinawm tih a sawi a. Tuna Electoral Roll Special Summary Revision-ah hian kumin October 1-a kum 18 tling chin te tan inthun thar dil theih a nih dawn thu leh August 31, 2023 thlengin hming thun thar, paih leh siamthat bakah insawn duhte tan dilna thehluh theih a nih dawn thu a sawi bawk.

Serchhip District-ah hian Assembly bial pathum (3) awmin heng ah hian Polling Station 88 a awm a, heng Polling Station tinah hian Booth Level Officer (BLO) pakhat zel zawmin 26-Serchhip (ST) AC-ah BLO 29, 27-Tuikum (ST) AC-ah BLO 32 leh 28-Hrangturzo (ST) AC-ah BLO 27 an awm mek a. Nimin-a BLO Training-a tel te hi Thenzawl SDO (Civil) V. Lalmuanpuii, ERO Serchhip chuan zirtirna pein Summary Revision of Electoral Rolls neih tura an mawhphurhna leh tih tur hrang hrang te a hrilhfiah a, Election Branch-a DEO V. Laltlanmawia chuan BLO Apps hman dan a zirtir bawk a ni. Ruahman lawk ang chuan Electoral Roll ennawn hna thawh tur atan hian Vawiin hian Serchhip District-a ERO leh AERO te tan Training neih leh a ni bawk ang.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man